У інтэрнэце з’явілася відэа: на віцебскай вуліцы падчас «Славянскага базара» натоўп моладзі спявае песню «Я веру» гурту «Ляпіс Трубяцкой». Гурт знаходзіцца пад негалоснай забаронай і не можа канцэртаваць у Беларусі пасля рэзкіх выказванняў Сяргея Міхалка на адрас Лукашэнкі.
Фатограф Антон Матолька, які заўважыў відэа, дзеліцца ў сваім блогу ражаннямі ад атмасферы «Славянскага базара»: «Усе тутэйшыя адзначаюць, што за апошнія гадоў пяць горад вельмі моцна змяніўся ў фестывальныя дні. І калі раней яны яшчэ выходзілі, гулялі, адпачывалі калі праходзіў «Славянскі базар у Віцебску», дык цяпер усе, хто мае магчымасць — з’язджаюць з горада.
Незлічоная колькасць міліцыі і АМАПа са спецназам. Нейкія палаткі ў шэраг, у 8 з 10 якіх прадаюць папкорн. Забарона установам ў радыусе 500 метраў ад плошчы Перамогі прадаваць алкагольныя напоі, у тым ліку піва. Што само сабой не перашкодзіла алкашні і гопнікам адысці гэтыя 500 метраў і купіць у краме тую ж «паўтарачачку моцнага».
«Шмат што прыйдзецца змяніць, каб падчас фестывалю, у які сёлета ўклалі 33 млрд рублёў, людзі не ўцякалі з горада — а заставаліся і запрашалі сваіх сяброў з іншых гарадоў і краін. Вельмі многае», — рэзюмуе аўтар.
