Зацверджаны новыя памеры мінімальных спажывецкіх бюджэтаў

У Беларусі зацверджаны новыя памеры сярэднедушавых мінімальных спажывецкіх бюджэтаў (МСБ) для васьмі сацыяльна-дэмаграфічных груп насельніцтва, паведамілі ў аддзеле комплексных праблем развіцця сацыяльна-працоўнай сферы Міністэрства працы і сацыяльнай абароны.

Сярэднедушавы мінімальны спажывецкі бюджэт сям’і з чатырох чалавек з 1 жніўня па 31 кастрычніка гэтага года складзе Br1 млн. 332 тыс. 100 у разліку на месяц. Гэта на 13,7% перавышае нарматыў, які дзейнічае з 1 мая па 31 ліпеня 2012 года (Br1 млн. 171 тыс. 590).

Паводле слоў спецыялістаў, асноўныя крыніцы расходаў сярэднедушавога МСБ сям’і з чатырох чалавек у цэнах чэрвеня 2012 года наступныя: прадукты харчавання — 57,2%, адзенне, бялізна, абутак — 21,4%, карыстанне жылым памяшканнем і камунальныя паслугі — 4,4%, бытавыя паслугі, транспарт, сувязь — 4,7%, прадметы культурна-бытавога і гаспадарчага прызначэння — 7,8%, культурна-асветныя мерапрыемствы і адпачынак — 1,3%, узносы і плацяжы — 0,9%, прадметы санітарыі, гігіены, лякарствы — 2,3%.

Зацверджаны таксама сярэднедушавыя мінімальныя спажывецкія бюджэты маладой сям’і з трох чалавек — Br1 млн. 397 тыс. 350,

працаздольнага насельніцтва — Br1 млн. 670 тыс. 390, пенсіянераў — Br1 млн. 296 тыс. 600, студэнтаў — Br1 млн. 305 тыс. 430, дзяцей ва ўзросце да 3 гадоў — Br1 млн. 37 тыс. 430, дзяцей ва ўзросце ад 3 да 6 гадоў — Br1 млн. 249 тыс. 100, дзяцей ва ўзросце ад 6 да 18 гадоў — Br1 млн. 503 тыс. 710.

У адпаведнасці з заканадаўствам, мінімальны спажывецкі бюджэт уяўляе сабой расходы на набыццё набору спажывецкіх тавараў і паслуг для задавальнення асноўных фізіялагічных і сацыяльна-культурных патрэбнасцей чалавека.

МСБ прымяняецца як сацыяльны нарматыў для прагназавання змяненняў узроўню жыцця насельніцтва, узмацнення сацыяльнай падтрымкі маламаёмных грамадзян, абгрунтавання мінімальных памераў дзяржаўных сацыяльных гарантый.

БелТА

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ