У Мінгарвыканкаме яшчэ не вырашылі, ці вяртаць бясплатны праезд студэнтам 9

Гэтае пытанне пакуль застаецца адкрытым, заявіў намеснік старшыні Мінгарвыканкама Ігар Карпенка на прэс-канферэнцыі 8 жніўня ў Мінску.

Разам з тым, паведаміў ён, школьнікі будуць ездзіць бясплатна, як і раней.

Бясплатны праезд для студэнтаў і навучэнцаў дзённай формы навучання ўстаноў адукацыі Мінска, якія забяспечваюць атрыманне прафесійна-тэхнічнай, сярэдняй спецыяльнай і вышэйшай адукацыі, улады ўвялі ў верасні 2011 года. 1 ліпеня 2012 года гэта норма была адменена.

Ігар Карпенка назваў права бясплатнага праезду студэнтам дыскусійным пытаннем.

Паводле яго слоў, пасля ўвядзення бясплатнага праезду гарвыканкам «атрымаў масу папрокаў», у тым ліку ад пенсіянераў, якія не разумеюць, чаму студэнты ездзяць бясплатна, а яны не.

На думку Карпенкі, студэнты могуць зарабляць як падчас канікул, так і навучальнага года. Напрыклад, у «савецкія часы студэнткі падпрацоўвалі прыбіральшчыцамі ў інтэрнатах, дзе жылі, а цяпер іх не ўгаворыш там працаваць».

Ільготы не павінны параджаць сацыяльнае ўтрыманства, падкрэсліў намеснік старшыні Мінгарвыканкама. Што да тых, хто аплачвае вучобу, то іх сем’і, паводле слоў Карпенкі, павінны разлічваць на ўласныя сілы, а не адпраўляць дзіця вучыцца чаго б гэта ні каштавала.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ