У склад участковых камісій уключана 10% ад апазіцыі 4

З 664 прадстаўнікоў чатырох апазіцыйных палітычных партый, вылучаных ва ўчастковыя выбарчыя камісіі, у іх склад быў уключаны 61, ці каля 10%.

Як паведаміў журналістам 9 жніўня сакратар Цэнтрвыбаркама Мікалай Лазавік, у склад участковых камісій было ўключана 39 прадстаўнікоў Беларускай партыі левых «Справядлівы свет» (вылучана — 216), 12 — Партыі БНФ (158), па пяць — Беларускай сацыял-дэмакратычнай партыі (Грамада) (30) і Аб`яднанай грамадзянскай партыі (240).

Акрамя таго, у склад участковых камісій не трапіў ніводзін з 20 вылучаных прадстаўнікоў Беларускай партыі «Зялёныя».

У той жа час з 845 прадстаўнікоў Камуністычнай партыі Беларусі ў склад участковых камісій уключылі 635 чалавек, з 832 прадстаўнікоў Рэспубліканскай партыі працы і справядлівасці — 704, з 609 прадстаўнікоў Беларускай сацыяльна-спартыўнай партыі — 551, з 571 прадстаўніка Беларускай аграрнай партыі — 485, з 262 прадстаўнікоў Рэспубліканйскай партыі — 235.

Лазавік ведае, што «некаторыя кіраўнікі палітычных партый гавораць, што яны вылучаюць у склад участковых камісій шмат прадстаўнікоў, але большасць іх кандыдатур адхіляюць». Ён адзначыў, што «аналіз якаснага складу кандыдатур ад апазіцыйных партый у склад участковых камісій выклікае толькі шкадаванне». У якасці прыкладу сакратар ЦВК прывёў сітуацыю па вылучэнні прадстаўнікоў АГП у склад участковых камісій у Гродзенска-Занёманскай выбарчай акрузе № 49. Паводле звестак Лазавіка, з 18 членаў партыі 9 не працуюць, а 10 прыцягваліся да крымінальнай або адміністрацыйнай адказнасці.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ