«ЛіМ» і «Звязда» аб’яднаюцца ў холдынг да 1 кастрычніка 3

Аб гэтым журналісту TUT.BY расказалі ў «ЛіМе». Нагадаем, у выніку аб’яднання з’явіцца выдавецкі дом «Звязда», які, магчыма, узначаліць ініцыятар і арганізатар аб’яднання, галоўны рэдактар газеты «Звязда» Алесь Карлюкевіч.

Плануецца, што тэматыкай новага выдавецтва будзе культура.

Пакуль асаблівых змен у холдынгу «Літаратура і мастацтва» не заўважылі. Першы намеснік дырэктара рэдакцыйна-выдавецкай установы «ЛіМ» Алесь Бадак рассказаў TUT.BY, што, па сутнасці, яго ўстанова далучаецца да «Звязды», таму ўсе пытанні трэба адрасоўваць кіраўніцтву газеты. «Усе выданні, якія на сённяшні дзень уваходзяць у рэдакцыйна-выдавецкую установу „Літаратура і мастацтва“ (газета „Лiтаратура i мастацтва“, часопісы „Полымя“, „Маладосць“, „Нёман“, „Вожык“. — TUT.BY) застаюцца. Мы пакуль чакаем, калі будуць падпісаны канкрэтныя дакументы», — паведаміў Алесь Бадак.

Пакуль супрацоўнікі выдавецтва не скарачаліся, толькі атрымалі ўведамленне аб рэагранізацыі ўстановы: «Усе творчыя стаўкі засталіся, нават, бяром новых работнікаў, калі ў штаце не хапае. Прымусова ніхто нікога не звальняў — гэта я магу сказаць адназначна».

Праўда, як стала вядома, з 1 жніўня працы пазбавіўся загадчык аддзела прозы пісьменнік Андрэй Федарэнка, які, дарэчы, заняў сёмае месца ў рэйтынгу самых паспяховых пісьменнікаў Беларусі партала TUT.BY.

Як пракаментавала кіраўніцтва «Літаратуры і мастацтва», у Андрэя Міхайлавіча скончыўся кантракт. Яму было прапанавана перайсці на поўную стаўку, але пісьменнік адмовіўся. «Вы ж разумееце, пасада, якая патрабуе заўсёднай работы з аўтарамі, не можа займаць толькі паўстаўкі», — кажа Алесь Бадак.

Галоўны рэдактар газеты «Звязда» Аляксандр Карлюкевіч размаўляць с журналістам адмовіўся, спаслаўшыся на занятасць.

Tut.by

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ