Прырост ВУП у 2013 годзе плануецца на ўзроўні 8,5, экспарту — 15,2%
Пра гэта ў справаздачы Лукашэнку паведаміў Мясніковіч.
Па словах Мясніковіча, якія прыводзіць прэс-служба Лукашэнкі, у цэлым для эканомікі прапануюцца няпростыя паказчыкі. Пры гэтым упор робіцца на інавацыйную накіраванасць, пашырэнне таварнай наменклатуры, для чаго будуць стварацца сучасныя вытворчасці. У цэлым урад ацэньвае аб’ём інвестыцый наступнага года ў 20 млрд. даляраў. З бюджэту выдзяляецца 2 трлн. рублёў «на прынцыпова новыя праекты інавацыйнай накіраванасці, так званы інавацыйны фонд». Акрамя таго, ва ўрадзе дамовіліся аб канцэнтрацыі часткі чыстага прыбытку, які застаецца ў распараджэнні дзяржаўных прадпрыемстваў, на прыярытэтныя праекты, «якія будуць вызначаць твар беларускай эканомікі».
Лукашэнка «падтрымаў асноўныя падыходы ўрада». У бліжэйшы час будзе праведзена нарада «па разглядзе ходу выканання прагнозу бягучага года і ўстанаўлення задач на 2013 год».
У бліжэйшы час да беларускіх дыпмісій будуць даведзены мэтавыя заданні па аб’ёмах экспарту і прамых замежных інвестыцыях. У сярэдзіне наступнага года кіраўнікі дыпмісій здадуць справаздачу аб выкананні пастаўленых задач.
Лукашэнка адзначыў, што пытанні сацыяльна-эканамічнага плану будуць абмеркаваны пры разглядзе асноўных кірункаў развіцця і бюджэту на будучы год. Ён нагадаў, што гэтыя асноўныя дакументы, якія вызначаюць развіццё краіны, павінны быць гатовыя да канца месяца, каб забяспечыць іх прыняцце да абрання новага парламента.
