Хочаце навучыцца выкрываць карупцыю і чыноўніцкую нядбайнасць, марыце стаць вядомым журналістам? Самы кароткі, хоць і цяжкі шлях да гэтай мэты, — журналісцкае расследаванне...
Як яго прайсці?
Сваім досведам падчас майстар-курса «Журналісцкае расследаванне» падзеліцца журналіст з больш чым 20-гадовым стажам Мікола Дзябёла.Найлепшы студэнт у лістападзе паедзе ў ОСЛА (Нарвегія).
За час майстар-курса рэальна правесці паўнавартаснае журналісцкае расследаванне.Разам з вядоўцам майстар-курса вы пройдзеце ўсе этапы гэтага нялёгкага шляху: ад выбару тэмы да напісання тэксту.
У кожнай краіне, нават самай дэмакратычнай і адкрытай, знойдзецца нямала тэмаў для журналісцкага расследавання.
Любая ўлада мае свой «шкілет у шафе», які старанна хавае ад усюдыісных журналістаў.А ў Беларусі, дзе чыноўнікі фактычна непадкантрольныя грамадству, такіх сакрэтаў значна больш. Да таго ж у нашай краіне свае дакументы пад грыфам «сакрэтна» мае права выдаваць амаль кожнае міністэрства і ведамства. У такіх умовах незалежным журналістам вельмі складана здабыць нават самую бяскрыўдную інфармацыю. Тым не менш, праводзіць расследаванне ў сучаснай Беларусі МОЖНА і ТРЭБА.
Можна, таму што заўсёды знойдуцца неабыякавыя людзі, гатовыя падзяліцца важнымі звесткамі з журналістамі. Трэба, таму што
незалежны журналіст у Беларусі нярэдка значна больш, чым журналіст: ён яшчэ і крыніца праўдзівай інфармацыі, апошняя надзея на справядлівасць.
Журналісцкае расследаванне называюць вышэйшым пілатажам журналістыкі.
Сапраўды, журналіст, якія займаецца расследаваннем, павінен быць уласна журналістам, а таксама адначасова мець досвед вучонага-даследчыка і дэтэктыва.
— Як спалучыць усе гэтыя якасці?
— Што такое журналісцкае расследаванне? Жанр ці метад збору інфармацыі?
— Як выбраць тэму журналісцкага расследавання?
— Як працаваць з крыніцамі інфармацыі, каб не пераўтварыцца ў «зліўны бачок» для кампрамату?
— Чым журналіст адрозніваецца ад Шцірліца?
— Як не трапіць на лаву падсудных і паклапаціцца пра сваю бяспеку падчас расследавання?
Адказы на гэтыя і іншыя пытанні мы знойдзем падчас майстар-курсу.
Курс стартуе 21 верасня 2012 ў Мінску. Выніковая сэсія - 2-3 лістапада ў Вільні. Цягам трох месяцаў праца будзе ісці ў дыстанцыйным рэжыме.
Заяўкі на ўдзел прымаюцца ад сябраў ГА «БАЖ» па электроннай пошце да 20 верасня ўключна на адрас: [email protected] (з пазнакай «Журналісцкае расследаванне»).
Ваша заяўка павінна ўтрымліваць:
1. Кароткі расповед пра сябе
2. Абгрунтаванне свайго жадання ўдзельнічаць у курсе.
