У Беларусі і Расіі — розныя погляды на аб’ёмы пастаўкі расійскай нафты

У Беларусі і Расіі пакуль розныя погляды на аб’ёмы пастаўкі расійскай нафты ў 2013 годзе, заявіў журналістам пасол РФ Аляксандр Сурыкаў 18 кастрычніка ў Мінску.

Паводле яго слоў, балансы на 2013 год «яшчэ толькі падлягаюць разгляду». «Беларусь гаворыць пра адны лічбы — на мой погляд, гэта 23 мільёны тон нафты і нейкі аб’ём нафтапрадуктаў. Але гэта — прадмет сур’ёзнага абмеркавання. У Расіі крыху іншы пункт гледжання», — сказаў пасол.

Ён зазначыў, што балансы паставак нафты і нафтапрадуктаў у межах Саюзнай дзяржавы будуць зацверджаны ў снежні 2012 года на пасяджэнні саюзнага ўрада.

На просьбу пракаментаваць нядаўнюю заяву расійскай кампаніі «Транснафта» аб тым, што яе тэхнічныя магчымасці дазваляюць у 2013 годзе паставіць у Беларусь 18 мільёнаў тон нафты, Сурыкаў заявіў: «Гэта „Транснафта“ заявіла. Але „Транснафта“ — гэта проста як выканаўца балансавай волі, ці што. Яна ў стане на гэтым этапе перапампаваць 18 мільёнаў тон, але ёсць і іншыя віды транспарту — чыгуначны і гэтак далей».

Характарызуючы беларуска-расійскія адносіны ў нафтавай сферы ў 2012 годзе, Сурыкаў падкрэсліў: «Усе дзеянні 2012 года ў цэлым упісваюцца ў межы нафтавага балансу, які агаворваў аб’ёмы паставак нафты і нафтапрадуктаў у Беларусь і пастаўкі нафтапрадуктаў у Расію».

Пры гэтым пасол звярнуў увагу, што сёлета пастаўкі нафтапрадуктаў з Беларусі ў Расію амаль не ажыццяўляліся.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ