Вечарам 3 лістапада ў ГУМе прайшла «ноч зніжак». З 21:00 да 00:00 там дзейнічала зніжка ў 50%, але не на ўсю цану тавару, а толькі на нацэнку.
І хоць сапраўдная зніжка складала 12%, рэкламны ход зрабіў сваю справу.
Кожную хвіліну ў краму прыходзіла ўсё болей і болей патэнцыйных купцоў. Попыт быў на ўвесь тавар, пачынаючы ад бялізнавых прышчэпак і сканчваючы тканінай і дыванамі. Самая вялікая чарга была налічана ў аддзеле жаночых калготак і панчох, каля 30 жанчын нястомна чакалі сваёй чаргі, каб нарэшце набыць запаветнае.
«Я разумею, калі стаяць за абуткам ці тэхнікай, але стаяць за калготкамі, ну прабачце, але ганьба», —абурылася жанчына, якая прапіхвалася праз натоўп.
Прыходзілі з мужамі і з дзецьмі. Набывалі кашулі і абутак, паліто і заплечнікі. Стомленыя дзеці сядзелі на пуфіках і не ведалі, чым жа сябе заняць, пакуль бацькі здабываюць новы тавар. На першым паверсе быў сапраўдны аншлаг, столькі людзей можна было пабачыць хіба на вялікіх святах і кірмашах.
«А я нават не ведала, што тут зніжкі, сказалі мне браць, ну я і бяру. Нельга такую магчымасць губляць. Хутка навагоднія святы, трэба рыхтавацца», —падзялілася са мной радасцю жанчына ў чарзе за навагоднімі упрыгожаннямі.
Трапіць да любой вітрыны з таварам было вельмі складана, з усіх бакоў іх абляпілі людзі. На мяне з фотаздымачом касіліся зусім не ветліва, адна бабуля нават заўвагу зрабіла:
«Што вы тут ходзіце, здымаеце? І так месца няма. Што тут здымаць? Калі браць нічога не будзеш, дык ідзі адсюль і не перашкаджай іншым!»