Успышка ВРІ і грыпу прагназуецца ў студзені-лютым 1

Пра гэта паведаміла галоўны пазаштатны пульманолаг Міністэрства аховы здароўя, загадчыца аддзела пульманалогіі і хірургічных метадаў лячэння хвароб органаў дыхання Рэспубліканскага навукова-практычнага цэнтра пульманалогіі і фтызіятрыі Ірына Лапцева 13 лістапада на прэс-канферэнцыі ў Мінску.

Паводле яе слоў, гэта звычайныя тэрміны для эпідэміі грыпу. Пакуль у Беларусі не адзначаецца ўспышак ВРІ і грыпу.

Як паведаміла Лапцева, у краіне пакуль таксама не адзначаецца «вялікай колькасці пнеўманій».

«Мы ўкладваемся ў сярэднегадавую норму на сённяшні дзень», — сказала галоўны пазаштатны пульманолаг міністэрства. Паводле яе інфармацыі, сёлета выпадкаў пнеўманіі ў Беларусі менш у параўнанні з 2011-м і тым больш з 2010 годам, калі адзначалася пандэмія грыпу A/H1N1.

Нагадаем, на пачатак лістапада ў Беларусі прышчэпкі ад грыпу атрымалі амаль 3 млн. 36 тыс. чалавек, або 31,7% ад усёй колькасці насельніцтва. З ліку ўсіх вакцынаваных больш як 1 млн. 123 тыс. чалавек атрымалі прышчэпкі за кошт рэспубліканскага бюджэту, амаль 1 млн. 615 тыс. — мясцовых бюджэтаў, больш за 285 тыс. — за кошт арганізацый і прадпрыемстваў, больш як 12 тыс. чалавек — за кошт асабістых сродкаў.

Міністэрства аховы здароўя настойліва рэкамендуе насельніцтву Беларусі ўзяць удзел у вакцынацыі супраць грыпу. Аптымальнымі тэрмінамі імунізацыі супраць гэтай хваробы з’яўляюцца верасень-лістапад.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ