У Беларусь едзе нашчадак Напалеона: ён возьме ўдзел у мерапрыемствах з нагоды 200-годдзя «Бярэзіны»

У мерапрыемствах, прысвечаных 200-годдзю вайны 1812 года, 24 лістапада ў Барысаўскім раёне возьме ўдзел нашчадак Напалеона Шарль Напалеон,

паведамілі ў прэс-службе пасольства Францыі ў Беларусі.

Французскую дыпмісію на цырымоніях будзе прадстаўляць пасол Мішэль Рэнеры і першая дарадчыца пасольства Ліз Тальба Барэ. Сёлета ганаровымі гасцямі цырымоніі таксама будуць Мірэй Мюсо, былы пасол Францыі ў Мінску, і член асацыяцыі «Памяць пра Напалеона», палкоўнік Філіп Гацье, аташэ па пытаннях абароны пасольства Францыі ва Украіне і Беларусі па сумяшчальніцтве, а таксама палкоўнік Жэрар Нубель, аташэ па пытаннях унутранай бяспекі пасольства Францыі ва Украіне і Беларусі па сумяшчальніцтве.

Разам з прадстаўнікамі Барысаўскага раённага выканаўчага камітэта ў мерапрыемстве возьмуць удзел супрацоўнікі пасольства Францыі, члены гістарычных клубаў Францыі, прадстаўнікі розных асацыяцый, якія займаюцца даследаваннямі эпохі Напалеона.

У 9.00 24 лістапада ў касцёле Нараджэння Панны Марыі ў Барысаве члены французскай дэлегацыі будуць прысутнічаць на набажэнстве ў памяць аб загінулых у вайне 1812 года.

На 10.30 французскім бокам запланавана наведванне месцаў пахавання ў вёсцы Студзёнка (Барысаўскі раён, левы бераг Бярэзіны) і ўскладанне вянкоў да мемарыяльных помнікаў і пахаванняў.

У 12.00 пасол Францыі і члены французскай дэлегацыі далучацца да ўдзельнікаў міжнароднага мітынгу-рэквіема на Брылеўскім полі (каля вёскі Весялова, правы бераг Бярэзіны), пасля якога адбудуцца паказальныя выступленні з удзелам ваенна-гістарычных клубаў і ўніфармісцкіх грамадскіх аб’яднанняў.

22 лістапада ў 16.00 у французскай медыятэцы тэатр-студыя Clartes і тэатр «Клас-А!» гімназіі № 74 Мінска пакажуць на французскай, рускай і беларускай мовах спектакль «Ішоў снег. 1812–2012».

23 лістапада ў 11.00 на пад’ездзе да Вілейкі (2-гі км аўтадарогі Р28) адбудзецца адкрыццё памятнага знака ўсім загінулым у вайне 1812 года, у якім возьме ўдзел першая дарадчыца пасольства.

23 і 24 лістапада ў Беларускім дзяржаўным універсітэце будзе праводзіцца міжнародная навуковая канферэнцыя «Вайна 1812 года і Беларусь», на ўрачыстым адкрыцці якой будзе прысутнічаць пасол Францыі ў Беларусі.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ