Вартаўнік аўтастаянкі, які заявіў пра збіванне міліцыяй, патрабуе адваката

Пажылы вартаўнік мінскай аўтастаянкі Васіль Сарочык, які заявіў пра збіванне міліцыяй, адмовіўся ад удзелу ў следчых дзеяннях без адваката.

Пра гэта паведаміла намеснік старшыні інфармацыйна-асветніцкай установы «Платформа» Алёна Красоўская-Каспяровіч.

Паводле яе слоў, праверку па заяве Сарочыка аб збіванні яго супрацоўнікамі міліцыі праводзіць упраўленне Следчага камітэта па горадзе Мінску. 26 лістапада супрацоўнікі УСК па Мінску правялі апытанне Сарочыка. «Пры гэтым мне як законнаму прадстаўніку Сарочыка не дазволілі прысутнічаць пры апытанні. Супрацоўнікі СК спаслаліся на нейкія артыкулы Крымінальна-працэсуальнага кодэкса, што я лічу незаконным. Артыкул 62 Канстытуцыі гарантуе права на юрыдычную дапамогу не толькі адвакатаў, але і іншых прадстаўнікоў. Крымінальная ж справа па заяве Сарочыка, наколькі нам вядома, не распачата, таму ўзнікае слушнае пытанне, пры чым тут КПК», — сказала Красоўская-Каспяровіч.

Сарочык вырашыў далей не браць удзелу ні ў якіх дзеяннях без адваката. «Сёння павінны былі правесці следчыя дзеянні — тыпу эксперыменту — ва УУС Ленінскага раёна.

Сарочык павінен быў ісці ў кабінет, паказваць і расказваць, як яго збівалі. Аднак мы толькі сёння склалі дагавор з адвакатам на аказанне юрыдычнай дапамогі. І таму папрасілі следчых перанесці гэтыя дзеянні», — паведаміла Красоўская-Каспяровіч.

Цяпер, паводле яе слоў, пра следчыя дзеянні супрацоўнікі СК будуць паведамляць адвакату.

Нагадаем, падзеі адбываліся 14 лістапада. Паводле слоў Сарочыка, у пункт аховы аўтастаянкі прыйшлі два супрацоўнікі праваахоўных органаў, адзін з якіх быў у цывільным.

Не паказваючы дакументаў і нічога не тлумачачы, яны загадалі вартаўніку накіравацца ў Ленінскае РУУС. Прыкладна гадзіну Сарочык знаходзіўся ў памяшканні дзяжурнай часткі ўпраўлення, а затым яго адвялі на допыт. Пазней высветлілася, што допыт праводзіла оперупаўнаважаная Ленінскага РУУС Багданоўская Ж. П. Паводле слоў Сарочыка, оперупаўнаважаная надзела на яго наручнікі і пачала збіваць, патрабуючы прызнацца ў крадзяжы надмагільных пліт, якія захоўваліся на тэрыторыі аўтастаянкі, а таксама саляркі і акумулятараў з машын. Акрамя таго, ад вартаўніка спрабавалі дабіцца прызнання ў тым, што ён перыядычна рабаваў кіёскі на рынку «Свелта».

Як сцвярджае Сарочык, яго білі нагамі і дубінкамі па галаве і целе, да збівання перыядычна падключаліся іншыя супрацоўнікі РУУС. Катаванні суправаджаліся нецэнзурнай лаянкай і пагрозамі забойства. Калі пажылы чалавек губляў прытомнасць, яго аблівалі халоднай вадой.

Усё гэта доўжылася прыкладна шэсць гадзін, але прызнання ад Сарочыка міліцыянеры не атрымалі. У выніку ў дачыненні да яго склалі нейкі дакумент, які пенсіянер падпісаў, будучы ўжо не ў стане яго прачытаць, і адпусцілі дадому.

Збіты вартаўнік звярнуўся з заявай у пракуратуру Ленінскага раёна Мінска і ў ІАУ «Платформа» з просьбай дапамагчы. «Платформа», у сваю чаргу, праінфармавала пра здарэнне Генпракуратуру, МУС і Следчы камітэт.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ