З рабскага сну
Дзень Волі сьвяткавалі ва ўсіх гарадах Беларусі
У Воранаве першымi — а 8-й ранiцы — правялi пiкет. Упершыню. Быў ажно 6-мэтровы транспарант «Жыве вольная Беларусь». У Мастах сабраліся мiтынгаваць 200 чалавек. У Шчучыне ў пiкеце стаялi 9 чалавек i шмат хадзiла навокал. У Сьвiслачы каля адзiнага ў краiне бюсьцiка К.Калiноўскага сабраліся на мiтынг каля 50 асобаў. Начальства мiтынг дазволiла, але адначасова абвясьцiла суботнiк у гарпарку.
Мiтынг адбыўся ў Лiдзе — ладзілі яго вячоркаўцы і пазьнякоўцы супольна. У Дзятлаве зьявiлiся надпiсы на сьценах i ўлёткi. У Бераставiцы — таксама надпiсы i бел-чырвона-белы сьцяг над нячынным касьцёлам. У Смаргонi прайшло невялiкае шэсьце.
У Наваполацку напярэдадні сьвята зьявіліся ўлёткі ў горадзе і бел-чырвона-белы сьцяг на ўнівэрсытэце. Ля гарадзкога Дому культуры адбыўся пікет-мітынг з удзелам больш як сотні чалавек.
У Віцебску яшчэ да пачатку шэсьця былі затрыманыя 6 чалавек. Сярод іх — дэпутат Шчукін, былы палітвязень Ул.Плешчанка, сп.Карпаў, Піменаў, Салаўян. Прозьвішча шостага арыштаванага пакуль невядомае.
На Магілёўшчыне мітынгавалі, дэманстравалі, вешалі на трубы сьцягі і сядзелі ў пастарунках. У Магілёве адбыліся шэсьце і невялічкі мітынг, у якіх удзельнічалі 150 магілёўцаў.
У Бабруйску не абышлося без затрыманьняў. Там актывісты БНФ і «Грамадзянскага Форуму» ў цэнтры раздавалі сьвяточныя буклеты пра гісторыю БНР. Міліцыя палічыла гэта мітынгам і арыштавала 8 чалавек. У пастарунку на іх склалі пратаколы, накшталт: «участвовал в организации проведения несанкционированного собрания на пл.Победы с 14.00 до 15.00, раздавая участникам собрания и прохожим гражданам газету «Рабочы Бабруйска» и другие издания, брошюры, не имеющие реквизитов о регистрации, публично обсуждая вопросы общественно-политической жизни, имел символику бело-красно-белого флага».
У Горках тутэйшы Мірон павесіў на высачэзную трубу кацельні беларускі сьцяг, а ўвесь горад быў абклеены адпаведнымі ўлёткамі. У Шклове Міронаў пакуль няма, дык нехта іншы намаляваў бел-чырвона-белы сьцяг на будынку райвыканкаму і напісаў «Жыве Беларусь!». У Крычаве адбыўся дазволены ўладамі пікет.
У Гомелі з раніцы на краі гораду адбыўся пікет. У Салігорску на стадыёне «Шахцёр» на сьвята сабраліся 50 чалавек. У Баранавічах на мітынг прыйшлі пад 200 чалавек, добра пасьвяткавалі, але пасьля У.Гоўшу затрымалі за тое, што ён нёс бел-чырвона-белы сьцяг. У Берасьці на стадыёне «Будаўнік» сабраліся каля 150 чалавек. Міліцыянты-варта ніяк не рэагавалі на правакацыі эрэн’ешнікаў, што тутсама задзіраліся.
Андрэй Аляксандраў,
Сяргей Астраўцоў, В.Баршчэўскі, Сымон Глазштэйн, Тацяна Сьнітко
