Новыя кнігі, дасланыя ў рэдакцыю
Даведнік беларускага журналіста/ Пад рэдакцыяй В.Вячоркі, П.Фэнрыха. — Шчэцін — Менск, 1999. — 198 с.
Кніга паўстала ў выніку цыклю беларуска-польскіх сэмінараў, зладжаных Фундацыяй разьвіцьця лякальнае дэмакратыі (Шчэцін) і цэнтрам «Супольнасьць» (Менск) для маладых беларускіх журналістаў. Кніга зьмяшчае парады як у спосабе напісаньня тэкстаў і рыхтаваньня матар’ялаў, гэтак і ўва ўніканьні моўных памылак (гэтай тэме прысьвечаныя тэксты Пётры Садоўскага й Вінцука Вячоркі). У аздобе вокладкі выкарыстаны адзін з нумароў «Нашае Нівы».
Кантакты й дыялёгі. № 4-5 (52-53), красавік-травень 2000. — Менск, 2000. — 64 с. — Наклад 299 ас.
Палова нумару прысьвечана чарговаму Кангрэсу беларусістаў, што нядаўна адбыўся ў Менску.
Arche. № 3 (8), 2000. Габрэйскі нумар. — Менск: 2000. — 296 с. — Наклад 1200 ас. ISSN 1392-9682
Нумар пра беларускіх жыдоў пры канцы ХХ ст.: мастацкае люстэрка ўнікальнай цывілізацыі.
І.Навуменка. Раньні Кузьма Чорны (1923-1929). — Менск: Беларуская навука, 2000. — 95 с. — Наклад 2000 ас. ISBN 985-08-0356-8
У кнізе разглядаюцца тыя творы «беларускага Дастаеўскага», што найчасьцей абміналіся крытыкаю.
Агляд падрыхтаваў Віктар Мухін