БТ вачыма беларуса
КІСЕЛЬ НА ДЭСЭРТ
У жніўні на БТ зьявяцца некалькі тэлепраграмаў францускай вытворчасьці. Заключаная дамова паміж «Першым нацыянальным каналам» і Францускім Міжнародным каналам, CFI. CFI займаецца закупкай праграмаў розных тэлекампаніяў Францыі і распаўсюдам іх на каналах іншых краінаў, якім было б цяжка самім гэта набыць. Гэткі мяккі францускі культурніцка-інфармацыйны ўплыў. Адпаведныя пагадненьні з CFI маюць 17 каналаў (і дзяржаўных, і прыватных) з былых сацыялістычных краінаў (сярод постсавецкіх – акрамя Расеі ды Эстоніі). Мяркуецца, што на БТ будзе 7 гадзінаў францускага эфіру штомесяц. Першыя паўгады – забясплатна, потым – 300 даляраў за месяц. Тэмы розныя – і мастацкія, і дакумэнтальныя, і мультфільмы, канцэрты. Ужо пачаўся запіс ды пераклад праграмаў. На беларускую.
А Рыгор Кісель гэтага, хутчэй за ўсё, не пабачыць. На пасадзе старшыні БТ ён сядзіць ледзь не апошнія дні. Практычна вырашанае пытаньне пра ягоны, як гэта звычайна робіцца, перавод на іншую працу – амбасадарам у адну з краінаў Сярэдняй Эўропы. Але напрыканцы ён яшчэ здолеў падкласьці сьвіньню Сталічнаму тэлебачаньню (СТВ). Як пісала «НН» у мінулым нумары, ужо тыдзень як выпускі сталічных навінаў меліся выходзіць у эфір ня толькі на «8-м», але й на канале ОРТ. Патрэбныя дамоўленасьці зь Міністэрствам сувязі Беларусі ды расейцамі былі. А Кісель загадаў сваім тэхнічным службам не пушчаць у эфір канкурэнтаў. Хаця, якая там пакуль канкурэнцыя – чатыры разы на тыдзень 15 хвілінаў менскага жыцьця пасьля гадзіны ночы. Але ж улез будучы амбасадар РБ не ў свае міждзяржаўныя пагадненьні, замяніў сабой цэлае беларускае міністэрства.
Лепш бы нармальнай канкурэнтаздольнасьці ды «раскруткі» БТ дамагаліся ад уласных праграмаў ды супрацоўнікаў. А то ў «Тэленавігатары» доўга й з гонарам распавядалі пра інтэрнэтаўскі сайт БТ, а самае галоўнае – які ж адрас?! – не сказалі. Гэта, напэўна, каб гледачы ў «гасьцявую кнігу» ня здолелі напісаць, што яны пра БТ думаюць…
Арцём Лук’яновіч
