Землятрус у Азэрбайджане
Як і сорак гадоў таму, азэрбайджанскія ўлады хаваюць колькасьць людзкіх ахвяраў апошняга землятрусу й рэальныя памеры разбурэньняў.
У ноч з суботы на нядзелю ў Азэрбайджане адбыўся моцны землятрус. Ягонае рэха пракацілася па ўсім Усходнім Каўказе. Пачаўся ён увечары, 25 лістапада, за 75 кілямэтраў ад Баку, у акваторыі Касьпійскага мора, дзе магутнасьць штуршкоў складала да 7 з паловаю балаў паводле шкалы Рыхтэра. Штуршкі адчуваліся і ў Дагестане, дзе ў Махачкале зафіксавалі 4 балы, а ў Ізбэрбашы - 5 балаў. У самой азэрбайджанскай сталіцы у 21.15 сіла сіла землятрусу была ад 5 да 6 балаў.
Людзі ў паніцы пакідалі шматпавярховыя дамы, у якіх штуршкі адчуваліся наймацней. У цэнтры Баку згасла сьвятло й перарвалася тэлефонная сувязь. У нядзелю раніцай міністар аховы здароўя Азэрбайджану Алі Інсанаў, выступаючы ў тэлебачаньні ў экстранным выпуску навінаў, паведаміў, што загінулі 3 чалавекі. Ён жа сказаў, што агулам 53 чалавекі атрымалі раненьні розных ступеняў, 33 зь іх шпіталізаваныя. Інсараў абвергнуў паведамленьні пра тое, што яшчэ некалькі чалавек сканалі ад інфарктаў. Ён жа запэўніў, што больш падземных штуршкоў не чакаецца.
Тымчасам незалежныя азэрбайджанскія мэдыі сцьвярджаюць, што колькасьць ахвяраў нашмат большая. Паводле папярэдніх зьвестак, загінулі сама меней 24 чалавекі. А расейскае агенцтва ІТАР-ТАСС паедаміла, што памерлі 8 чалавек.
У СМІ згадваюць гэткі ж магутны землятрус, што адбыўся тамсама 40 гадоў назад. Колькасьць загінулых таксама лічылі дзясяткамі, але дакладнае лічбы ніхто ня ведае й дасюль. Улады схавалі праўду. Гейдар Аліеў тады быў простым афіцэрам КГБ. Напэўна, спыняць чуткі таксама было ў ягонай кампэтенцыі. І вось гісторыя паўтараецца. Адно толькі што Аліеў цяпер мае нашмат большыя магчымасьці. Як прэзыдэнт краіны.
Гары Куманецкі
