Прывіды Гоі (Goya's Ghosts)
Гішпанія, 2006, каляровы, 114 хв.
Рэжысэр: Мілаш Форман
Ролі выконваюць: Хаўер Бардэм, Наталі Портман, Стэлан Скарсгард, Рэндзі Куэйд, Бланка Партыльё, Майкл Лонсдэйл, Хасэ Луіс Гомес, Мабэль Рывэра
Жанр: Гісторычная драма з элемэнтамі біяграфіі
Адзнака: 8 (з 10)
1792 год. Гоя (Стэлан Скарсгард) малюе прыгожую дзяўчыну Інэс (Наталі Портмэн), якая неўзабаве трапляе ў турму інквізыцыі, як патаемная іудзейка. Інквізытар Лярэнца (Хаўер Бардэм), яшчэ адзін кліент мастака, абяцае дапамагчы Гоі – і спакушае дзяўчыну. Іхняя дачка станецца прастытуткай.
А калі пасьля выгнаньня напалеонаўскіх войскаў Лярэнца пакараюць сьмерцю, як калябаранта й герэтыка, за ягоным целам будзе ісьці звар’яцелая Інэс і аглухлы Гоя…
Ашаламляльны сацыяльны гратэск Мілаша Формана, дзе біяграфія Гоі – толькі нагода для гістарычных кашмараў і залімітнай бульварнай мэлядрамы.
Гоя – рэпартэр, мэдыюм, пасярэднік.
Ягоныя прывіды на афортах не адлюстроўваюць жыцьцё, а становяцца ім.
І што тут можа Гоя зрабіць? Здані гісторыі скалынаюць паветра: герылья, інквізыцыя, акупанты – і няшчасны твар музы.
Мілаш Форман паказвае маленькага чалавека, на якога вызьверылася эпоха. Чалавек можа быць каралеўскім жывапісцам – ці дзіцём багатага купца. Ён агент Сьвятое палаты, які становіцца змагаром за “Свабоду, роўнасьць, братэрства” – ці біскуп, на якога начапілі кайданкі. Злучво хараства й звыродства, годнасьці й подласьці, мужнасьці й прыстасаванства, жорсткасьці й сэнтымэнтальнасьці.
Ці не такое жыцьцё на зломе?
Хаўер Бардэм дэманструе надзвычайныя здольнасьці пераўвасабленьня, Наталі Портман грае адначасова дзьве ролі – зьнявечанай прыгажуні й ейнай дачкі-прастытуткі; Мілаш Форман палохае і зьдзіўляе.
Да вас прыйшлі прывіды Гоі.
Сэансы ў кінатэатры “Перамога” 14-17 чэрвеня а 18.30.
