Урокі для апазыцыі
«Усебеларускім народным сходам» Лукашэнка распачаў сваю мабілізацыйную кампанію
Сход выявіўся добра прадуманай рэклямнай акцыяй з удзелам такіх спэцыяльна запрошаных зорак, як нобэлеўскі ляўрэат родам зь Віцебску, сын чыноўніка каляніяльнай адміністрацыі Жарэс Алфёраў, газавы магнат з «Ітэры» Ігар Макараў, лідэр украінскіх камуністаў Сыманенка, бранскі губэрнатар-камуніст Лодкін, мітрапаліт Філарэт, расейскамоўная актрыса Акружная, кіраўнік Беларускага грамадзка-культурнага таварыства ў Польшчы, пасол Сойму Ян Сычэўскі, вязень сумленьня Павал Барадзін. Праграма разьвіцьця краіны была з помпай і адзінадушна ўхваленая. БТ здымала гэтую зорную ростань на відэастужку ідэальнай якасьці.
Сход прадэманстраваў, наколькі ўкараніліся дэмакратычныя вартасьці і дзяржаўніцкія рытуалы за пяць апошніх гадоў. Сход не спрабаваў прызначыць дату выбараў. Лукашэнка падкрэсьліў немагчымасьць аднаўленьня Савецкага Саюзу.
Кастрычніцкая плошча была аформленая гербамі гарадоў Беларусі. (Некалі ж маглі і сцэнамі Лядовага пабоішча размаляваць!) У прэзыдыюме сядзелі не сьвінаркі й пастухі, а даволі рэспэктабэльны менскі істэблішмэнт.
Лукашэнка трохі фальшывіў, нібы напярэдадні перарэпэтаваў славутыя «экспромты» і старанна прадуманыя моўныя «ляпы», за якія яго гэтак любяць простыя людзі і СМІ. (Прамова поўнілася засьцярогамі ад правядзеньня выбараў «спусьця рукі», абяцаньнямі памагчы «зь бюджэту трыма пальцамі», адкрыцьцямі, што жыды змагаліся з нацыстамі толькі «ў Беларусі да Смаленшчыны і Масквы», бо «наш народ стварыў ім умовы для гэтага», і што ў кожнага чалавека мусіць быць радзіма, «на якой жыць і паміраць натуральнай сьмерцю».) Красамоўства адэскага пашыбу глядзелася штучна.
Зь іншага боку, уразіла, наколькі Лукашэнка ведае — і гэта прыклад для апазыцыі — праблемы «звычайнага чалавека» дый не баіцца гаварыць пра іх. Чаго варты хоць бы пасаж пра бандытызм на польскіх дарогах і бясьпеку нашых магістраляў.
Лукашэнка быў стрыманы і асьцярожны ў ацэнках апазыцыі (што можна парадзіць і ягоным апанэнтам) у адпаведнасьці з парадамі паліттэхнолягаў. Па ўсім відаць, што ён наважаны змагацца перадусім за цэнтрысцкі электарат.
Затое вырвалася ў Лукашэнкі неасьцярожнае прызнаньне пра існаваньне пазабюджэтных фондаў. У іх захоўваюцца, напрыклад, сродкі, атрыманыя за продаж танкаў, што падпалі пад скарачэньне ў адпаведнасьці з дамовай аб узброеных сілах у Эўропе. Такое выкарыстаньне дзяржаўных грошай караецца згодна з крымінальным заканадаўствам.
Апазыцыі, што за 13 гадоў існаваньня не набыла нават звычайнай гукаўзмацняльнай устаноўкі й дагэтуль выступае на мітынгах празь фізрукоўскі рупар, ёсьць чаму павучыцца ў вялікага гаваруна. Посьпех правага блёку залежыць ад таго, ці хопіць у яго фантазіі, каб здабыць падтрымку Вольгі Корбут і Івана Іванкова, Алёны Сьвірыдавай і Ігара Карнелюка, Марыі Гулегінай ды Барыса Кіта. Зь перадумоваю вылучэньня адзінага кандыдата. У «партыі ўлады» ён даўно адзіны.
Мікола
Антылукашэнкаўскія пратэсты: 30 затрыманых
З самай раніцы на плошчу перад Палацам Рэспублікі, дзе адбываўся «сход», прыходзілі й людзі, нязгодныя з палітыкай Лукашэнкі. З самай раніцы грамадзяне ў цывільным пад кіраўніцтвам міністра Навумава затрымалі два дзясяткі сяброў Кансэрватыўна-Хрысьціянскай Партыі БНФ. Уладзімеру Юху пры арышце пераламалі скабы, цяпер ён у больніцы.
У абед у арыштанцкі аўтобус трапілі сябры Маладога Фронту, якія, пераапрануўшыся ў гістарычных пэрсанажаў, спрабавалі адзначыць Дзень музэяў каля «Макдональдзу».
Увечары, нягледзячы на навальніцу і шквал, дзясяткі актывістаў Аб’яднанай Грамадзянскай і Кансэрватыўна-Хрысьціянскай партый зноў выйшлі на праспэкт Скарыны з партрэтамі зьніклых палітыкаў. Да вечаровай акцыі далучыўся й Сямён Домаш — верагодны адзіны кандыдат патрыятычна-дэмакратычнага блёку.
Б.Т.
