 Petr Kellner |
Чэскі мільярдэр Пэтэр Келнэр, маёмасьць якога ацэньваецца ў шэсьць мільярдаў даляраў, прагназуе зьмены ў Беларусі ўжо празь некалькі гадоў.
Расказваючы пра свой бізнэс, Пэтэр Келнэр нагадаў, што «ў Беларусі ў канцы 2006 г. мы купілі невялікі «Лорабанк», які будзе таксама прапаноўваць прадукты і паслугі па спажывецкім крэдытаваньні». «Гэты праект мы павінны запусьціць у канцы 2007 г.», — паведаміў чэскі магнат.
Свой прыход на беларускі рынак мільярдэр патлумачыў так:
«Празь некалькі гадоў сытуацыя (у Беларусі) зьменіцца, а значыць, нам трэба быць там ужо цяпер».
У інтэрвію газэце «Ведомости» Пэтэр Келнэр заявіў, што «урэшце эканоміка Беларусі стане адкрытай, я ў гэтым перакананы».
Фінансавая група PPF створаная ў 1991 г. У PPF уваходзяць «PPF banka», банк «Home Credit», «PPF Asset Management», страхавая кампанія «Česká pojišťovna», «CP Invest», «CP Direct», «CP Reinsurance company», пэнсійны фонд «CP», «CP Strategic Investments», «Home Credit» і «Česká pojišťovna» у Славаччыне, Чэская страхавая кампанія і «Хоум Кредит энд Финанс Банк» у Расеі, украінскія «Приват Кредіт», «Агробанк» і «Ceska Pojistovna Украіна», «Хоум Кредит Казахстан», «Лорабанк» (Беларусь).
Фінансавая група PPF купіла кантрольны пакет акцыяў беларускага «Лорабанку» ў канцы 2006 г. Актывы «Лорабанку» па стане на 30 верасьня 2006 г. складалі 6,4 млрд. рублёў (2,4 млн. эўра).
