Стужынская

Прэміяй Багушэвіча, якую прысуджае Беларускі ПЭН-цэнтар, уганараваная дасьледчыца гісторыі Ніна Стужынская — за кнігу “Беларусь мяцежная: з гісторыі ўзброенага антысавецкага супраціву 20-х гадоў ХХ стагодзьдзя”.

Прэмія была заснаваная ў 1994 г. Даюць яе за літаратурныя творы на гістарычную тэматыку. Сярод ляўрэатаў ужо былі Ўладзімер Арлоў, Генадзь Сагановіч, Міхась Чарняўскі, Алесь Белы й інш.

Уганараваньне адбылося ў памяшканьні ПЭН-цэнтру 25 лістапада, напярэдадні ўгодкаў Слуцкага збройнага чыну.

Як зазначыў У.Арлоў, які ўручаў прэмію, Н.Стужынская атрымлівае яе за аднаўленьне аб’ектыўнай гісторыі і паказ гістарычнай праўды. Ейная кніга, якая выйшла ў 2000 г. мізэрным накладам у 300 асобнікаў, адгортвае маладасьледаваныя старонкі антыкамуністычнага змаганьня ў 1920-я — найперш гаворка йдзе пра Слуцкі збройны чын ды падпольную сялянскую партыю “Зялёны Дуб”. Дасьледчыца кажа, што ейная галоўная мара цяпер — каб нехта зь пісьменьнікаў увасобіў герояў тае кніжкі ў мастацкай прозе.

Калі такое адбудзецца, хтось з случчакоў і зеленадубцаў стане ляўрэатам новай прэміі ПЭНу — імя Багдановіча. Пра заснаваньне такой абвясьціў другі віцэ-прэзыдэнт ПЭН-цэнтру Віталь Тарас. Даваць яе будуць за найлепшыя мастацкія кнігі году, незалежна ад жанру — паэзія, проза, драматургія. Першая прэмія будзе ўручаная налета 9 сьнежня 2003 году — у дзень народзінаў Максіма.