Сёньня Змагар нябачнага фронту, апазыцыйны палітык Лабэцька, Чэсны Журналіст, ініцыятар разнастайных рэфэрэндумаў Яр.Ашук і праваслаўны літаратар Касьцям разважаюць пра ўчынак беларускага пасла ў Японіі ды іншыя балючыя і важныя для грамадзтва тэмы.
Змагаp: Вяртаюцца сталінскія часы! Антынародны рэжым ахапіў сваімі чорнымі кіпцюрамі ўсю плянэту! У Токіё зьнік беларускі палітык!
Касьцям: Надалей будзе навука! Нашлі каго паслаць! Увіду неблаганадзейнасьці краіны, туды цяпер трэба выправіць каго-небудзь асабліва адказнага — пажадана вайскова-патрыятычнага. Вось, напрыклад, даўно сядзяць бяз працы генэрал Акалец і палкоўнік Залятанін.
Змагар: Гэтыя не пагодзяцца. У Японію ж трэба праз Расею ехаць. А ў Расеі іх яшчэ до-обра памятаюць...
Чэсны Журналіст: Ды не абавязкова каб быў вайсковец! Вунь Казулін прафэсар, а яго ў ААН прызначылі Беларусь прадстаўляць. Не баяцца, што ўцячэ з усім унівэрсытэтам.
Яр.Ашук: Дарэчы, пра Расею. Мне здаецца, што нашым паслом у Японіі мог бы зрабіцца адзін з думскіх дэпутатаў — хто-небудзь з фракцыі “Ядзінства” ці СПС-у. Я на месцы Гаранта Канстытуцыі проста спытаўся б у Пуціна — той лепей разьбіраецца ў нашай міжнароднай палітыцы.
Чэсны Журналіст: Вы, калега, пакуль не на месцы Гаранта Канстытуцыі.
Касьцяm: І ўвогуле, не разумею, як можна прамяняць менскі “Лістапад” на гнюсны амэрыканскі фаст-фуд? Каб я быў дзе за мяжой у гэты час — на крылах прыляцеў бы! Каб толькі быў дзе за мяжой... Каб жа нас, праваслаўных літаратараў, куды запрашалі...
Лабэцька: А я вунь колькі па заграніцах ні езьдзіў — і ў Брусэль, і ў Маскву, — заўсёды вяртаўся. І не на які-небудзь “Лістапад”, а проста таму, што я — патрыёт сваёй радзімы і бачу яе шчасьлівай і незалежнай, але аб’яднанай з Расеяй на прынцыпах Эўразьвязу!
Чэсны Журналіст: Вы гэта да чаго?
Лабэцька: А... проста так...
Яр.Ашук: А мне здаецца, што гэтыя ўцёкі — сыгнал да блізкіх зьменаў у беларускім грамадзтве. Хутка палятуць галовы і закруцяцца гайкі! Пакуль ня позна — яднаймася з Ра...
Касьцям: Так! Так! Гэта сыгнал! Гэта знак зь нябёсаў! Адны мы засталіся праваслаўныя ў аблозе масонскага сьвету! Зачынімся й нікога нікуды ня пусьцім — на халеру нам розныя паслы ды місіі АБСЭ! У нас свая місія!
Змагар: Місія? А мэсія ці ёсьць? Мо той, што бяз чэскае візы сядзіць, адрынуты ўсім цывілізаваным сьветам?
Касьцям: Ну і няхай сядзіць! Мы і яго нікуды ня пусьцім. Нават у Партугалію. Не хапала, каб ён там палітычнага прытулку папрасіў.
Але тут патэлефанавалі зь Міністэрства ўнутраных справаў і сказалі, што, калі аналітыкі ня сьціхнуць, палітычнага прытулку давядзецца прасіць камусьці іншаму.
Аддзел аналітыкі
