 |
Ад сёння лідэр дэмакратычных сіл Беларусі Аляксандр Мілінкевіч распачынае паездкі па ўсіх рэгіёнах Беларусі. Сустрэчы з актывістамі, жыхарамі гарадоў і мястэчак, абмеркаванне мясцовых праблем і агульнай сітуацыі ў краіне, а таксама далейшае стварэнне яшчэ больш разгалінаванай сеткі народнага Руху «За Свабоду», стануць галоўнымі мэтамі паездкі па Беларусі.
— Як і падчас мінулай прэзідэнцкай кампаніі, я буду імкнуцца заехаць у кожны куток нашай Бацькаўшчыны, каб паразмаўляць з простымі людзьмі, даведацца пра іх турботы, іх штодзенныя праблемы і пастарацца іх ў будучым вырашыць, — адзначыў палітык.
— Менавіта такія паездкі і сустрэчы з’яўляюцца адзінай магчымасцю даведацца пра рэальную сітуацыю, пра рэальнае становішча грамадзян ў нашай краіне. Гэта таксама спроба вырашыць існуючыя рэгіянальныя праблемы шляхам прыцягнення да іх увагі збоку простых жыхароў і міжнароднай грамадскасці. Прыкладам тут можа служыць грамадская кампанія ў абарону Гародні, якую распачаў і якой вельмі актыўна займаюся сумесна з іншымі грамадскімі і палітычнымі актывістамі Рух «За Свабоду».
Візіт лідэра дэмакратычных сіл па Беларусі пачынаецца з Гродзеншчыны, дзе праходзіць кампанія «Абаронім Гародню».
