Роўна два гады таму, на хвалі папулярнасьці альбому «Я нарадзіўся тут», ініцыятар супольных праектаў Алесь Суша прапанаваў зрабіць складанку на вершы Ўладзімера Караткевіча.
І, здаецца, пайшла справа: Вольскі, Памідораў, Вайцюшкевіч, Корань зрабілі свае песьні. Алесь Пушкін узяўся аздобіць альбом. Прэса на ўсе застаўкі анансавала выхад «Personal Караткевіч» з працоўнай назвай «Скрыпка дрыгвы». Але альбому дагэтуль няма. Чаму — разьбіраўся карэспандэнт «НН».
Кожны ўдзельнік праекту называе свае прычыны. Алесь Суша нявыхад «Скрыпкі» патлумачыў так: «Паслухаўшы дэма-варыянты, я зразумеў, што гэта будзе крок назад у параўнаньні зь «Я нарадзіўся тут». Аляксандар Памідораў зважае на псыхалягічную стомленасьць удзельнікаў праекту: «Вар’яцкая сямейка «Народнага альбому» была тры гады разам — сумесныя канцэрты, гастролі, альбомы… Гэта адбілася на псыхалягічным стане музыкаў». Гэтаксама лічыць Лявон Вольскі. Аляксандар Кулінковіч адной з галоўных называе прычыну тэхнічную: «Мы ўсе пісаліся на студыі БТ, дзе трэба граць ужывую. А «Нэйра Дзюбель» прызвычаіўся рабіць запіс на аналягавай студыі, у якой можна было пісацца кавалкамі, нешта мяняць месцамі і г.д.». На тэхнічныя праблемы наракаюць і Памідораў, і гукарэжысэр запісу Сяргей Лабандзіеўскі.
Поўны варыянт артыкулу глядзіце ў газэце "Нашa Ніва".
Сяргей Будкін
