З 1 студзеня 2008 г. у Латвіі будзе ўсталяваны новы афіцыйны ўзровень мінімальнага заробку — 160 латаў (662 тыс. беларускіх рублёў), а мінімум, што не абкладаецца падаходным падаткам, павысіцца з 50 да 80 латаў.
Такі сьмелы крок, зазначае латвійская прэса, учора зацьвердзіў Кабінэт міністраў, нягледзячы на папярэджаньні, што гэта можа выклікаць рост інфляцыі і дэфіцыт у бюджэце.
Цяперашні латвійскі «мінімум» (120 латаў, або 496,6 тыс. беларускіх рублёў) — адзін з самых нізкіх у краінах Эўразьвязу — меней паводле закону плацяць толькі ў Румыніі і Баўгарыі. Цяпер ён будзе болей на 30 адсоткаў.
Паводле інфармацыі Міністэрства статыстыкі і аналізу Рэспублікі Беларусь, сярэдні налічаны заробак работнікаў па краіне ў траўні 2007 г. склаў 686 852 рублі (г.зн. 166 латаў або 320 даляраў ЗША).
У 1930-ыя Латвія была для жыхароў Заходняй Беларусі адной з самых папулярных краінаў працоўнай эміграцыі. Крыху больш нашых суайчыньнікаў зьяжджалі толькі ў Канаду і Аргентыну.
