Палітыка Джорджа Буша жывіць натхненьне рок-артыстаў — «Faithless», «Sonic Youth», «Bestie Boys», Паці Сьміт.
Адкрытая антыбушаўская агітацыя, паэтычныя мэтафары, развагі пра стан сьвету напярэдадні выбараў у ЗША.
Калі год таму антысадамаўская кааліцыя заатакавала Ірак, музычны шоў-бізнэс скаланула. Абавязак выказацца адчулі найбуйнейшыя зоркі. Чым бліжэй пад Багдад падсоўваліся амэрыканскія войскі, тым больш зьяўлялася песень антываеннай тэматыкі. З пацыфісцкімі дэклярацыямі выступалі прадстаўнікі самых розных плыняў — ад «R.E.M.», Лэні Кравіца і ню-мэталічнай групы «System Of A Down» да выканаўцаў кантры.
Гэтым апошнім, зрэшты, давялося заплаціць за гэта надта высокую цану. Амэрыканскае асяродзьдзе прыхільнікаў кантры традыцыйна вельмі кансэрватыўнае. Крытыка палітыкі Джорджа Буша-малодшага большасьцю аматараў была прызнана непатрыятычнай і недастойнай. Таму жаночае трыё «Dixie Chicks», каб ня страціць прыхільнікаў, вымушана было шмат тлумачыцца адносна закідаў на адрас прэзыдэнта, якія яно дазволіла сабе на гастролях у Вялікай Брытаніі. Вілі Нэльсан, аўтар антываеннай баляды «Whatever Happened To Peace On Earth», нічога тлумачыць не зьбіраўся, таму да сёньня многія амэрыканскія кантры-радыёстанцыі байкатуюць ягоныя песьні.
Краявід зь вежамі
Вайна ў Іраку мабілізавала нават тых выканаўцаў, якія неахвотна карыстаюцца ў сваёй творчасьці палітычнымі лёзунгамі. Хіп-хоп-трыё «Beastie Boys», якое па-за сцэнай ангажаванае ў разнастайныя палітычныя ініцыятывы, але ў сваіх альбомах імкнецца пазьбягаць адназначных дэклярацый, гэтым разам запісала кампазыцыю «In A World Gone Mad» адкрыта антыбушаўскага характару. «Спачатку ваюем з тэрорам, цяпер ваюем з Іракам — // Мы падыходзім да рысы, зь якой ня будзе вяртаньня», — рэпавалі «Beasties». Група не абмежавалася адным творам. На выдадзенай пару месяцаў таму кружэлцы «To The 5 Borougs» поўна палітычных «штучак». Правакуе ўжо вокладка, на якой мы бачым панараму Нью-Ёрку напярэдадні 11 верасьня 2001 г. зь вежамі Сусьветнага гандлёвага цэнтру, якія кідаюцца ў вочы. Усё выглядае так, нібыта «Beasties» хацелі б павярнуць час назад і выкрасьліць некалькі апошніх гадоў з гісторыі. «Мы мусім скінуць Джорджа У.», — агітуюць сьпевакі ў кампазыцыі «That’s It That’s All».
Поўнасьцю гэты артыкул можна прачытаць у папяровай і pdf-вэрсіі "Нашай Нівы"
Сяргей Мікулевіч
з выкарыстаньнем матэрыялаў gazeta.pl
