Так, ва Ўкраіне слова «апэльсін» зьнітаванае з палітычнымі рэаліямі. А чым мы горшыя? Мінулы год падараваў нам шэраг устойлівых слоў, фраз, вобразаў, многія зь якіх, калі іх выкарыстоўваць у штодзённым жыцьці, здольны ўзбагаціць лексыку беларускай мовы.
Хачу, як казаў Маякоўскі, прымусіць зьзяць наступныя словы і выразы.
«Газпром». Газават у лютым 2004-га быў для беларускіх бюргераў ня менш нечаканым, чым пачатак вайны 22 чэрвеня 1941-га. Мы да іх, вынаходнікаў балалаек і матрошак, усёй душой, а яны — адрубілі газ. Такім чынам, «Газпром» выступае як крылатая характарыстыка нявернага сябра, ад якога заўсёды можна атрымаць «нож у сьпіну». Добрае слова для лексыкону баптыстаў: «Сярод апосталаў быў Іуда Іскарыёт. Ен аказаўся газпромам».
«Уводзіць адзіную валюту». Які год без інтэграцыйных пацалункаў! У 2004 г. усе проста крануліся на глебе ўвядзеньня адзінай валюты. Калі спачатку да пэрспэктывы сьмерці «зайчыка» ставіліся сур’ёзна, пры канцы году абяцанкі ўвесьці адзіную валюту пачалі выклікаць рогат. Відавочна, у народзе працэс пераходу на расейскі рубель паступова пачынае асацыявацца са значэньнямі «цягнуць час», «марудзіць». Зручны афарызм для выкарыстаньня ў спартовых камэнтарах: «Каб захаваць на таблё пераможны лік, футбалісты «Дынама» пачалі ўводзіць адзіную валюту».
«Непрацуючы кандыцыянэр». Лажануўшыся на «Эўрабачаньні», група «Аляксандар і Канстанцін» прымусіла дзяржаўныя СМІ шукаць знадворныя фактары правалу карыфэяў беларускай эстрады. Іх знайшлі: непрацуючы кандыцыянэр у нумары музыкаў. Прычына настолькі прымітыўная, што спалученьне так і просіцца да ўжываньня ў сэнсе «танная ды галімая адмазка». Раю для даішнікаў: «Чаму перавысілі хуткасьць? Толькі не кажыце, што кандыцыянэр не працаваў».
Поўны варыянт артукулу чытайце ў папяровай і pdf-вэрсіі гаэты "Наша Ніва"
Лёлік Ушкін, левы радыкал
