Спрадвечныя песні беларускіх мужчын
18 красавіка ў музеі Янкі Купалы. 18.30.
18 красавіка гурт «Рада» прэзентуе альбом мужчынскага традыцыйнага спеву «Гара».
Як паведаміў НН адзін з удзельнікаў гурту Васіль Мардачоў,
у альбом увайшлі застольныя, шыхтовыя, рэкруцкія песні, запісаныя на Палессі — у асноўным на Століншчыне і Тураўшчыне.Збіралі іх самі ўдзельнікі гурту.
«Мы стараліся не паўтарацца, шукаць такія песні, варыянтаў якіх не сустракалі ў ранейшых запісах», —кажа спадар Васіль. Песні прагучаць, вядома ж, на палескім дыялекце.
«Рада» не прывязаная ні да якой філармоніі, дома культуры ці фальклорнай студыі. Гэта гурт людзей, проста шчыра зацікаўленых народнай творчасцю.
У «Радзе» спяваюць прадпрымальнікі, рабочы з МАЗа, супрацоўнік камп’ютарнай фірмы…Цікава, што ў гурце, апроч чатырох мужчын, ёсць адна жанчына.
Як гучыць «Рада» можна будзе пачуць 18 красавіка ў музеі Янкі Купалы ў Мінску (вул. Янкі Купалы, 4). Пачатак, а 18.30.