Арганізатара Мілавідскага фэсту ў гонар каліноўцаў выклікаюць у Баранавіцкі РАУС

Удзельнікі Мілавідскага фэсту ў гонар 150-х угодкаў Мілавідскай бітвы 1863 года.

Жыхара Баранавічаў Віктара Сырыцу, як арганізатара Мілавідскага фэсту ў гонар 150-х угодкаў Мілавідскай бітвы 1863 года, выклікаюць 12 чэрвеня ў РАУС. Гэта стала вядома з ліста, які ён атрымаў 9 чэрвеня з аддзела ўнутраных спраў райвыканкама за подпісам часова выконваючага абавязкі начальніка РАУС падпалкоўніка міліцыі Майсені.

У лісце паведамляецца, што ў адносінах да Віктара Сырыцы складзены адміністрацыйны пратакол за здзяйсненне адміністрацыйнага правапарушэння, таму грамадскаму актывісту «неабходна прыйсці ў Баранавіцкі РАУС для падпісання пратакола».

«Яны не могуць мне дараваць правядзенне 2 чэрвеня Мілавідскага фэсту ў гонар 150-х угодкаў Мілавідскай бітвы 1863 года. Баранавіцкі райвыканкам 3 і 20 мая двойчы незаконна нам забараняў правядзенне культурна-гістарычнага свята. Лічу, што не мы парушылі закон, а Баранавіцкі райвыканкам не выконвае арт. 51 Канстытуцыі Беларусі і не дае нам права на ўдзел у культурным жыцці», — абураецца Віктар Сырыца.

Пад Мілавідамі адбылася адна з найбольшых бітваў між паўстанцамі і акупацыйнымі войскамі. На месцы бітвы стаіць помнік.

Каментары да артыкула