Сямашка паехаў у Пецярбург на эканамічны форум
У межах удзелу беларускай дэлегацыі ў ХVII Пецярбургскім міжнародным эканамічным форуме 20 чэрвеня адбылася рабочая сустрэча першага намесніка прэм'ер-міністра Беларусі Уладзіміра Сямашкі з намеснікам старшыні ўрада Расіі Аркадзем Дварковічам.
Паводле інфармацыі беларускага пасольства ў Расіі, абмеркаваны ход рэалізацыі сумесных інтэграцыйных праектаў. "Таксама адбыўся канструктыўны абмен меркаваннямі па іншых актуальных пытаннях беларуска-расійскіх гандлёва-эканамічных адносін", — гаворыцца ў паведамленні.
У ХVII Пецярбургскім міжнародным эканамічным форуме, які пачаў сваю працу 20 чэрвеня, Беларусь прадстаўляе дэлегацыя на чале з Сямашкам і паслом Беларусі ў Расіі Ігарам Петрышэнкам.
Чакаецца, што ў мерапрыемствах форуму возьмуць удзел кіраўнікі амаль 200 замежных і больш як 400 расійскіх кампаній, а таксама 144 члены замежных афіцыйных дэлегацый, якія прадстаўляюць 66 дзяржаў.
Па традыцыі ў форуме возьме ўдзел Уладзімір Пуцін.