Неафіцыйны кліп на песню «Ляпісаў» з кадрамі з Майдану набраў у сем разоў болей праглядаў, чым афіцыйны ролік
Неафіцыйны кліп на свежую песню гурту «Ляпіс Трубяцкі» «Воіны света» ўжо набраў больш за 750 тыс. праглядаў на Youtube.com за пяць дзён.
Відэа выклаў на YouTube 2 сакавіка карыстальнік Alex Karpenko.
На відэа — Героі Майдану, пачынаючы ад лістапада, калі пачаліся акцыі пратэсту ў Кіеве. У прыватнасці, таксама ёсць на відэа бел-чырвона-белыя сцягі, загінулы 22 студзеня на Грушэўскага беларус Міхаіл Жызнеўскі ды армянін Сяргей Нігаян. Прыводзіцца таксама сюжэт з прэс-канферэнцыі Януковіча 28 лютага, калі былы прэзідэнт Украіны зламаў асадку, просячы прабачэння ва ўкраінскага народа.
Цікава, што афіцыйны кліп «Ляпісаў» на гэту песню, выкладзены 4 сакавіка, нягледзячы на вялікую колькасць аголеных жаночых целаў, набраў у сем разоў меней праглядаў —103 тыс.