Лаўроў здзіўлены падпісаннем асацыяцыі Украіны з ЕС
Міністр замежных справаў Расіі Сяргей Лаўроў заявіў, што Украіне варта было б дачакацца «больш легітымнай» сітуацыі для падпісання пагаднення аб асацыяцыі з Еўрасаюзам.
Кіраўнік расійскага МЗС выказаў здзіўленне тым, што Кіеў падпісаў палітычную частку пагаднення да фармавання новых органаў улады ў выніку датэрміновых прэзідэнцкіх выбараў, якія павінныя прайсці 25 мая, і канстытуцыйнай рэформы.
На думку кіраўніка расійскай дыпламатыі, падпісанне такога дакумента цалкам легітымнымі ўладамі было б больш этычным крокам.
Адначасова з гэтым кіраўнік расійскага замежнапалітычнага ведамства заявіў, што падпісанне пагаднення аб асацыяцыі з Еўрасаюзам — унутраная справа Украіны.
21 сакавіка ў Брусэлі кіраўнікі 28 краін Еўрасаюза, кіраўнікі ЕС і прэм'ер-міністр Украіны Арсеній Яцанюк падпісалі палітычную частку пагаднення аб асацыяцыі Еўрасаюза з Украінай.