Лукашэнка: Літасці нікому не будзе
president.gov.by
Аляксандр Лукашэнка заклікае захоўваць існуючыя ў краіне стабільнасць і бяспеку.
Пра гэта ён заявіў сёння ў Барысаве на сустрэчы з прадстаўнікамі працоўных калектываў прадпрыемстваў абароннага сектара.
Лукашэнка падкрэсліў, што асноўным напрамкам яго дзейнасці на прэзідэнцкай пасадзе з'яўляецца гарантаванне бяспекі дзяржавы.
«Ніхто ніколі не даруе прэзідэнту, і ён нічым не апраўдаецца, калі гэтая стабільнасць, якая ў нас ёсць, будзе парушаная і мы страцім у тым ліку ваенную бяспеку», — адзначыў беларускі лідар.
Лукашэнка падкрэсліў вялікую важнасць таго факту, што людзі ў Беларусі, напрыклад, могуць спакойна і без страху адпусціць дзяцей на вуліцу.
«У нашым свеце гэта ўжо найвялікшае дасягненне. Гэта самае галоўнае, і нам гэта нельга страціць», — сказаў кіраўнік дзяржавы.
«Літасці нікому не будзе, ні жулікам, ні злодзеям, ні тым, хто перашкаджае нам жыць.
Таму давайце разам захоўваць гэтую стабільнасць. Што ад мяне залежыць, я не проста імкнуся,
я гэта раблю разам з мужыкамі, якія стаяць у мяне за спіной.
Для таго мы і ёсць у дзяржаве, каб абараніць нашы сем'і», — рэзюмаваў беларускі кіраўнік.