У Расіі хочуць забараніць чыноўнікам лятаць замежнымі авіякампаніямі
Міністэрства працы РФ прапанавала забараніць расійскім чыноўнікам карыстацца для камандзіровак паслугамі замежных авіяперавозчыкаў. Праект адпаведнай пастановы апублікаваны для грамадскага абмеркавання на адзіным партале прававых актаў.
Калі дакумент уступіць у сілу, то чыноўнікі не змогуць купляць для дзелавых паездак квіткі на рэйсы замежных авіякампаній і будуць вымушаныя абмежавацца паслугамі расійскіх авіяперавозчыкаў.
Пры гэтым у праекце пастановы прадугледжаныя і выключэнні з гэтага правіла. У прыватнасці, паслугамі замежных авіякампаній можна будзе карыстацца ў выпадку, калі расійскія перавозчыкі не выконваюць рэйсы да месца, куды чыноўнік павінен ляцець у камандзіроўку.
У тлумачальнай запісцы да дакумента ўдакладняецца, што яго задачай з'яўляецца павышэнне канкурэнтаздольнасці расійскіх авіякампаній. У той жа час прыватныя паездкі чыноўнікаў гэтыя абмежаванні не закрануць.