63-гадовы мінскі праграміст ствараў безлімітныя праязныя на метро
Бо ўмеў.
Супраць 63-гадовага мінскага праграміста распачатая крымінальная справа, паведамляе Следчы камітэт. Яго падазраюць у вырабе безлімітных праязных на метро, што трапляе пад артыкул крымінальнага кодэксу пра несанкцыянаваны доступ да камп’ютарнай інфармацыі.
Праграміст працаваў у закрытым акцыянерным таварыстве, што спецыялізавалася на праязных-радыёкартках. Ён скарыстаўся сваімі прафесійнымі ведамі і праграмаваў «пустыя» радыёкарткі на паўторнае шматразовае выкарыстанне. Праязныя ён перадаў дачцэ і некалькім знаёмым.
Следчы камітэт сцвярджае, што такія махлярствы з электроннымі праязнымі выкрываюцца імгненна. Міліцыя вылічыла як карыстальнікаў ілжэпраяздных, так і іх вырабніка.
Расследаванне працягваецца, высвятляецца дакладны памер шкоды транспартнікам і колькасць эпізодаў справы. Зламысніку можа пагражаць як просты штраф, так і больш жорсткія пакаранні — да двух год пазбаўлення волі. Прававая ацэнка будзе дадзеная дзеянням не толькі вырабніка, але і карыстальнікаў картак.