Мінэканомікі пад эгідай дэнамінацыі на траціну павысіла тарыф на перадачу электраэнергіі
Міністэрства эканомікі пастановай № 43 ад 24 чэрвеня 2016 года ўстанавіла новы тарыф на «паслугу, што аказваецца рэспубліканскімі ўнітарнымі прадпрыемствамі электраэнергетыкі дзяржаўнага вытворчага аб`яднання электраэнергетыкі «Белэнерга», па перадачы і размеркаванні электрычнай энергіі, вырабленай на тэрыторыі Рэспублікі Беларусь юрыдычнай асобай, якая не ўваходзіць у склад названага аб`яднання , і перададзенай адасобленым (структурным) падраздзяленням вытворцы электрычнай энергіі, якія знаходзяцца ў вобласці (г. Мінску), супадальнай з вобласцю (г. Мiнскам) — месцам размяшчэння энергакрыніцы вытворцы электрычнай энергіі».
З 1 ліпеня тарыф будзе складаць 4 капейкі за кілават-гадзіну (400 рублёў у недамінаваных рублях). Цяперашні тарыф роўны 305 рублям (3,05 новай капейкі), ён быў устаноўлены 29 сакавіка 2012 года. Такім чынам, павышэнне тарыфу склала 31,1%.
Між тым 17 чэрвеня, размаўляючы ў Гомелі з работнікамі кандытарскай фабрыкі «Спартак», Аляксандр Лукашэнка заявіў: «Росту цэн у сувязі з дэнамінацыяй не будзе — гэта я вам гарантую. Мы за гэта адарвем галовы, калі хтосьці паспрабуе скарыстацца гэтым тэхнічным працэсам».
«Калі ідзе пералік цэн, ёсць жаданне ледзь-ледзь павысіць, на капейку. Больш, вядома, не атрымаецца, таму што ўсё пад кантролем, — сказаў ён. — Але мы дамовіліся, і ўрад давёў рашэнне: не трэба нават на капейку павышаць. панізьце на адну капейку, і людзі скажуць, што мы прыстойна паступілі».