Алексіевіч стала ганаровым сябрам Беларускай асацыяцыі журналістаў
Такое рашэнне 9 верасня прыняла Рада журналісцкага аб’яднання.
— Святлана Алексіевіч заўсёды была вельмі блізкім чалавекам для Беларускай асацыяцыі журналістаў. БАЖ заўсёды падтрымліваў, перажываў і радаваўся перамогам Святланы, а пісьменніца ў сваю чаргу заўсёды ўважліва сачыла за сітуацыяй у беларускім медыясектары.
Яшчэ ў мінулым годзе ў нас з’явілася выдатная ідэя запрасіць Святлану ганаровым сябрам у нашу арганізацыю. Яна дала згоду, і вось нарэшце мы яе вітаем і вельмі ганарымся такім сяброўствам, — гаворыць прэс-сакратар ГА «БАЖ» Барыс Гарэцкі.
Апроч Святланы Алексіевіч ганаровымі сябрамі ГА «Беларуская асацыяцыя журналістаў» з’яўляюцца беларускі паэт Сяргей Законнікаў, расійскі пісьменнік і праваабаронца Аляксей Сіманаў, а таксама амерыканскі журналіст Глэй Хасвэл.