Рэжысёра Кірыла Сярэбранікава адправілі пад хатні арышт
Басманны суд Масквы адправіў мастацкага кіраўніка «Гогаль-цэнтра» Кірыла Сярэбранікава, які абвінавачваецца ў буйным махлярстве, пад хатні арышт, у якім ён правядзе каля двух месяцаў, паведамляе Дождь.
У той час, як суддзя зачытвала рашэнне, у залу суда даносіліся крыкі людзей з вуліцы, яны скандавалі «Ганьба!».
Падчас пасяджэння суда адвакат пералічыў імёны людзей, якія выступілі паручыцелямі Сярэбранікава — больш за 30 чалавек. Сярод іх тэлевядучы Іван Ургант, спявак Філіп Кіркораў, тэлевядучы Андрэй Малахаў, рэжысёр Аўдоцця Смірнова, актрысы Ксенія Рапапорт, Чулпан Хаматава і Лізавета Баярская і іншыя.
Сярэбранікаў сваю віну не прызнаў і даваць паказанні адмовіўся. «Абвінавачванні мне здаюцца абсурднымі і немагчымымі», — заявіў рэжысёр.