Названая краіна, якая правядзе перанесены з Беларусі чэмпіянат Еўропы па тэквандо
Еўрапейская федэрацыя тэквандо назвала краіну — гаспадыню кантынентальнага форуму, які на мінулым тыдні забралі ў Беларусі, паведамляе Tut.by
Чэмпіянат Еўропы ў алімпійскіх вагавых катэгорыях і 6-ы адкрыты чэмпіянат Еўропы па паратэквандо пройдзе з 7 па 10 снежня ў Сафіі (Балгарыя).
«Горад Сафія вядомы некалькімі галоўнымі спартыўнымі падзеямі і многімі чэмпіянатамі па тэквандо, якія ён праводзіў у мінулым, і таму чакаецца, што сталіца Балгарыі правядзе якаснае мерапрыемства, якое будзе адпавядаць стандартам WTE», — гаворыцца на сайце Еўрапейскай федэрацыі тэквандо.
Прычынай пераносу чэмпіянату Еўропы па тэквандо з Мінска на сайце еўрапейскай федэрацыі былі названыя «непрадбачаныя абставіны». Турнір у Мінску планавалася правесці 26—29 кастрычніка 2017 года.
Міністр спорту Аляксандр Шамко заявіў, што рашэнне Еўрапейскай федэрацыі тэквандо аб пераносе чэмпіянатаў Еўропы выклікае здзіўленне.
У канцы жніўня кіраўнікі Беларускай федэрацыі тэквандо правялі прэс-канферэнцыю, дзе рапартавалі пра гатоўнасць беларускай сталіцы прыняць чэмпіянат Еўропы.
Але за дзень да той прэс-канфэрэнцыі Беларуская федэрацыя тэквандо адправіла ў адрас кіраўніцтва Еўрапейскай федэрацыі тэквандо ліст, у якім прасіла аб дапамозе і падтрымцы ў вырашэнні некалькіх праблемных пытанняў, звязаных з правядзеннем ЧЕ-2017.
Так, беларусы прасілі даць чатыры васьмікутныя маты і сістэму імгненных відэапаўтораў, якія маглі б затым выкарыстоўвацца на Еўрапейскіх гульнях-2019. Праўда, тэквандо ў праграму Еўрагульняў-2019 у Мінску не ўваходзіць.
Таксама БТФ прасіла разгледзець магчымасць арэнды тэлевізійнага абсталявання для арганізацыі трансляцый.