Мінпрыроды прапанавала забараніць перасоўныя і кантактныя заапаркі
Міністэрства прыродных рэсурсаў прапануе ўнесці ў закон «Аб абыходжанні з жывёламі», які ўжо даўно абмяркоўваюць, забарону на выкарыстанне перасоўных і кантактных заапаркаў, перасоўных звярынцаў і перасоўных выстаў для экспанавання дзікіх жывёл. Пра гэта паведамляе «Зялёны партал».
Такая інфармацыя ўтрымліваецца ў адказе за подпісам намесніка міністра прыродных рэсурсаў і аховы навакольнага асяроддзя Беларусі Аляксандра Корбута на зварот мазырскага каардынатара ініцыятывы «Зялёны дазор» Паўла Наздры.
У снежні 2017 года, калі ў Мазыр з гастролямі прыехаў расійскі перасоўны дэльфінарый «Атлантыда», некалькі жыхароў Мазыра і Мінска напісалі звароты ў розныя кантралюючыя органы з просьбай праверыць гастралёраў на прадмет жорсткага абыходжання з жывёламі і запусцілі петыцыю з патрабаваннем забароны перасоўных дэльфінарыяў.
Як паведаміў Аляксандр Корбут, праверыць ўмовы ўтрымання дэльфінаў не атрымалася: калі чыноўнікі патрапілі ў дэльфінарый, жывёл ужо вывезлі ў Расею.
Зараз з'явілася надзея на тое, што такога варварства ў нашай краіне стане менш. Пакуль свае прапановы прыродаахоўнае ведамства накіравала ў Міністэрства жыллёва-камунальнай гаспадаркі, якое рыхтуе праект закона «Аб абыходжанні з жывёламі».
«Інфармуем, што Мінпрыроды накіраваны ліст Міністэрству жыллёва-камунальнай гаспадаркі Рэспублікі Беларусі, які змяшчае прапановы ў праект Закона Рэспублікі Беларусі« Аб абыходжанні з жывёламі», у тым ліку па фармулёўках яго асобных норм артыкулаў, уключаючы ўвядзенне забароны на выкарыстанне перасоўных і кантактных заапаркаў, перасоўных звярынцаў і перасоўных выстаў для правядзення культурна-відовішчных мерапрыемстваў з выкарыстаннем дзікіх жывёл, у тым ліку іх экспанавання», — гаворыцца ў адказе.
Перасоўныя заапаркі і дэльфінарыі забароненыя ў шмат якіх краінах, у тым ліку ў суседняй Украіне. Магчыма, і Беларусь стане ў гэтым плане больш цывілізаванай.