29 прабітых колаў у Мілінкевіча
«Гэта толькі тыя здарэнні, калі даводзілася мяняць шыны, а колькі яшчэ было выпадкаў, калі атрымлівалася папярэдзіць праколы»
За 2008 год лідэру Руху за Свабоду Аляксандру Мілінкевічу аж дваццаць дзевяць разоў прабівалі колы ў машынах.
«Гэта толькі тыя здарэнні, калі даводзілася мяняць шыны, а колькі яшчэ было выпадкаў, калі атрымлівалася папярэдзіць праколы», — кажа намеснік Мілінкевіча Юрась Губарэвіч.
Большасць падобных інцыдэнтаў адбываліся падчас паездак палітыка па рэгіёнах.
Найбольш цікавы выпадак адбыўся ў Слоніме, калі ў машыне прабілі тры колы проста ў міліцэйскім дворыку.Аднойчы ў Берштах, на малой радзіме Мілінкевіча, зламыснікі так стараліся, што прабілі кола нават у суседскай машыне.
Яшчэ двойчы летась аўтамабіль экс‑кандыдата на пасаду прэзідэнта залівалі фарбай.