У Мінгарвыканкаме занепакоіліся познімі шлюбамі і прапанавалі ўвесці новы школьны курс
Курс «Сем'язнаўства» прапануецца ўвесці ў беларускіх школах, паведаміла журналістам старшыня камітэта па працы, занятасцi i сацыяльнай абароне Мінгарвыканкама Жанна Рамановіч, перадае БелТА.
«Мы настойліва выступаем за тое, каб гэты курс быў у нашых навучальных установах, паколькі познія шлюбы і позняе нараджэнне дзяцей, колькасць разводаў — усё гэта кажа пра тое, што мы ў гэтым плане недацягваем», — сказала Жанна Рамановіч.
Як лічыць старшыня камітэта, адных мер матэрыяльнага стымулявання ўжо недастаткова. А увядзенне курса «здольна пазітыўна паўплываць на дэмаграфічную сітуацыю». Жанна Рамановіч у цэлым адзначыла важнасць усвядомленага не толькі мацярынства, але і бацькоўства.