Усіх дактароў і медсясцёр у Маскве правераць на імунітэт да COVID-19
Усе медыцынскія работнікі ў Маскве пройдуць экспрэс-тэст, які дазваляе выявіць наяўнасць антыцелаў да каранавіруса, распавяла журналістам віцэ-мэр сталіцы Анастасія Ракава, піша РБК.
Яна ўдакладніла, што тэставанне пройдуць не толькі тыя, хто працуе ў перапрафіляваных для прыёму заражаных бальніцах, стацыянарах, але і дактары іншых бальніц і паліклінік.
«Мы будзем выкарыстоўваць два віды экспрэс-тэстаў, якія прайшлі выпрабаванні ў гарадскіх бальніцах і паказалі добры вынік», — сказала Ракава.
Віцэ-мэр патлумачыла, што ў якасці матэрыялу для тэсту возьмуць невялікую колькасць крыві з пальца. «Экспрэс-тэсты не выяўляюць наяўнасць у крыві віруса — яны выяўляюць імунаглабулін, які дазваляе не толькі сказаць, ці хварэе чалавек, але і вызначыць, ці хварэў ён раней, ці выпрацаваны ў яго антыцелы да інфекцыі», — дадала Ракава.