Брытанская разведка: Раптоўныя беларускія вучэнні «адпавядаюць сезоннай норме»
Традыцыйная ранішняя справаздача брытанскіх спецслужбаў была прысвечаная сёння раптоўнай праверцы боегатоўнасці Узброеных сіл Беларусі, абвешчанай учора. Брытанцы сапраўды назіраюць, што беларускія сухапутныя войскі выходзяць з гарнізонаў у поле, але трывогу з гэтай нагоды біць не схільныя.
Фота: Міністэрства абароны Беларусі
Паводле брытанскай разведкі, усё «гэта адпавядае сезоннай норме, бо кульмінацыя зімовага цыкла вучэнняў у Беларусі надыходзіць у маі».
Праўда, пішуць брытанскія разведчыкі, высокая верагоднасць, што Расія паспрабуе раздзьмуць пагрозу, якая ствараецца для Украіны гэтымі вучэннямі, каб скаваць украінскія сілы на поўначы і перашкодзіць іх перакідванню для ўдзелу ў бітве за Данбас.
У той жа час «адхіленняў ад звычайнай для вучэнняў актыўнасці, здольных прадстаўляць пагрозу для саюзнікаў і партнёраў, цяпер не чакаецца», падкрэсліваюць брытанцы.