«Мінсктранс» абмежаваў продаж квіткоў на міжнародныя аўтобусы для беларусаў з візай D
Не кожны ўладальнік нацыянальных віз тыпу D цяпер можа купіць білет на міжнародны аўтобус з Мінска. Як распавялі Office Life у «Мінсктрансе», квіткі прададуць толькі ў тым выпадку, калі такая віза выдадзеная краінай уезду.
Прасцей кажучы, купіць білет на міжнародны аўтобус, які ідзе праз Польшчу, змогуць толькі ўладальнікі нацыянальнай польскай візы, праз Літву — толькі літоўскай, а праз Латвію — толькі латвійскай. Пры гэтым пасажыру з нацыянальнай нямецкай візай адмовяць у куплі квітка на рэйс з Мінска ў Мюнхен, бо аўтобус перасякае беларускую мяжу з Польшчай. Па гэтай жа прычыне пасажыр з польскай нацыянальнай візай не зможа купіць білет на аўтобус да Вільні ці Рыгі.
У «Мінсктрансе» патлумачылі, што правіла дзейнічае з 7 верасня. Для ўладальнікаў звычайных шэнгенскіх віз нічога не змянілася.
Змены назвалі часовымі і звязваюць іх са складанасцямі пры перасячэнні дзяржаўнай мяжы з краінамі Шэнгенскага пагаднення.
У сваю чаргу, на аўтавакзале ў Брэсце распавялі, што ніякіх абмежаванняў для продажу квіткоў не ўводзілі:
— Візу мы не правяраем, вы самі несяце за яе адказнасць. Без пытанняў прадаём квіткі і беларусам, і палякам.
Няма абмежаванняў на куплю білетаў і ў прыватных перавозчыкаў з Мінска. Прадстаўнікі адной з кампаній пацвердзілі, што квіткі ў аэрапорт Вільні або Каўнаса без праблем прадаюць па нацыянальных візах Польшчы і іншых краін.