«Таварышы, канец!»: у Будапешце тысячы венграў пратэставалі супраць Орбана
16.03.2025 / 16:35
Тысячы венграў выйшлі на мітынг у Будапешце ў знак пратэсту супраць палітыкі прэм'ер-міністра Віктара Орбана і ў падтрымку апазіцыйнай партыі «Ціса» ў суботу, 15 сакавіка.
Людзі збіраюцца ля мемарыяла і праводзяць акцыю пратэсту, арганізаваную ў гадавіну венгерскай рэвалюцыі 1848-49 гадоў. Фота: Balint Szentgallay / NurPhoto via Getty Images
Пра гэта піша «Еўрапейская праўда» са спасылкай на Telex і 444.
15 сакавіка на мітынгу выступіў былы паплечнік прэм'ер-міністра Венгрыі Віктара Орбана, а цяпер лідар апазіцыі Петэр Мадзьяр, які заклікаў адправіць дзейнага кіраўніка ўрада на сметнік гісторыі за здраду нацыянальным інтарэсам.
У сваёй прамове палітык заявіў, што «вясна венграў» ужо наступіла, і паабяцаў пакласці канец «зімы Орбана».
«Я заўсёды лічыў, што прэм'ер-міністр дасягнуў самай нізкай кропкі, і я веру, што яму ўдалося дасягнуць гэтага дна сёння», — заявіў ён.
Мадзьяр сказаў, што ёсць прамовы, якія не трэба каментаваць, таму што яны кажуць самі за сябе.
На акцыі ён паабяцаў апублікаваць апытанне па 12 ключавых эканамічных і палітычных пытаннях, каб пачуць «голас нацыі».
Таксама падчас крытыкі Орбана Мадзьяр заявіў, што «ўсё скончана».
«Або калі вы разумееце лепш: таварышы, канец!», — заявіў ён, сказаўшы апошнюю фразу на рускай мове.
Фраза «Таварышы, канец!» — гэта адсылка да вядомага плаката першых свабодных выбараў у Венгрыі 1990 года.
Орбан заявіў групе з некалькіх тысяч абраных прыхільнікаў, што Венгрыя ў бліжэйшыя тыдні ліквідуе сродкі масавай інфармацыі і іншыя арганізацыі, якія атрымліваюць фінансаванне з-за мяжы, параўнаўшы такія групы з казуркамі.
15 сакавіка ён таксама апублікаваў у сацсетках паведамленне пад назвай «Чаго венгерская нацыя хоча ад Брусэля». Апошні пункт са спісу патрабаванняў Орбана гучыць так: «Саюз, але без Украіны».