З чым паехаў у Рым неўязны ў Еўрасаюз старшыня КДБ?

Прэс-сакратар КДБ Аляксандр Антановіч адмовіўся паведаміць падрабязнасці, заявіўшы, што «змест мерапрыемстваў складае службовыя звесткі».

Пра тое, што прэм’ер-міністр Беларусі 28 лютага падпісаў распараджэнне № 84р «Аб камандзіраванні старшыні Камітэта дзяржбяспекі Беларусі Вадзіма Зайцава ў г. Рым (Італьянская Рэспубліка)», паведамляе Нацыянальны прававы інтэрнэт-партал. Аднак тэкст дакумента закрыты, у сувязі з чым дата і мэта паездкі невядомыя.

Прэс-сакратар КДБ Аляксандр Антановіч адмовіўся паведаміць БелаПАН якія-небудзь падрабязнасці, заявіўшы, што «змест мерапрыемстваў складае службовыя звесткі».

У пасольстве Італіі ў Мінску паведамілі, што амбасада «не выдавала візу гэтаму грамадзяніну».

Вадзім Зайцаў уключаны ў спіс неўязных у ЕС беларускіх чыноўнікаў, адказных за парушэнні правоў чалавека.

Спіс з 158 прозвішчаў быў зацверджаны міністрамі замежных спраў ЕС 31 студзеня 2011 г. Гэтым асобам забаронены ўезд на тэрыторыю Еўрасаюза.

Нагадаем, што ў студзені гэтага году міністр унутраных спраў Беларусі Анатоль Куляшоў, які таксама знаходзіцца ў спісе неўязных у ЕС, наведваў Францыю. Французская віза была выдадзеная яму па просьбе Інтэрпола.

Каментары да артыкула