Лукашэнка падтрымаў Іран
Пра гэта ён заявіў падчас сустрэчы з міністрам замежных спраў Ірана.
«Мы актыўныя праціўнікі ўсялякага дыктату і навязвання волі звонку. Мы супраць таго, каб суверэннай, незалежнай дзяржаве з боку паказвалі, як ёй развівацца і ў якім напрамку. Упэўнены, што так разумеюць гэта і ў Іране», — падкрэсліў ён, сустракаючыся ў Мінску з міністрам замежных спраў Ірана Алі Акбарам Салехі.
«Любое кіраўніцтва любой краіны павінна быць нацэлена на тое, каб было лепш і стабільней жыць грамадзянам гэтай краіны. І я ведаю, што ваш прэзідэнт, і парламент, і духоўны лідар нацэлены менавіта на гэта, і мы такую палітыку падтрымліваем», — дадаў Аляксандр Лукашэнка.
Ён адзначыў, што ў Беларусі вельмі ўважліва сочаць за сітуацыяй вакол Ірана. «Яна нам не абыякавая. Мы вельмі разумеем і спачуваем ўсяму таму, што адбываецца вакол Ірана, бо і самі часам адчуваем хай не такія жорсткія нападкі на нашу краіну, але тым не менш», — сказаў Лукашэнка.
Аляксандр Лукашэнка сказаў, што ў яго склаліся вельмі добрыя і цёплыя адносіны з кіраўніком Ірана і яго духоўным лідарам. «Вельмі спадзяюся, што пасля парламенцкіх выбараў, якія, на шчасце, прайшлі ў вас нармальна, Іран стане яшчэ стабільней, мабільней і будзе скіраваны ў будучыню ў імя сваіх грамадзян», — адзначыў ён.