У Оршы праваслаўныя будуць маліцца па-беларуску

Праваслаўныя будуць маліцца па-беларуску ў Свята-Пакроўскім храме.

У суботу некалькі беларускамоўных вернікаў і аршанскія краязнаўцы звярнуліся да манахіні Даніілы, якая на сённяшні дзень адказная за рэстаўрацыю будынка былога Базылянскага манастыра, з ініцыятывай правядзення ў Свята-Пакроўскім храме службаў на беларускай мове.

Праводзіць паўнавартасныя літургіі на мове тытульнай нацыі на сёняшні дзень немагчыма — у прыхода няма ўласнага святара, а ў Оршы няма ніводнага беларускамоўнага праваслаўнага святара, які мог бы правесці такое набажэнства.

Тым не менш, папярэдне было вырашана паспрабаваць пачаць беларускамоўныя супольныя малітвы і духоўныя сустрэчы — тое што можа праходзіць і без запрашэння святара, з тым каб у перспектыве развіваць выкарыстанне мовы ў прыходзе.

Адзін з ініцыятараў правядзення беларускамоўных набажэнстваў Віктар Сцяпанаў, лічыць, што правядзенне малітваў на роднай мове актывізуе беларускамоўную грамаду Аршаншчыне і дазволіць хутчэй сабраць сродкі на рэстаўрацыю будынка былога манастыра, у якім у будучым плануецца адкрыць багадзельню.

Такім чынам, Свята-Пакроўскі храм можа стаць адзіным праваслаўным прыходам у рэгіёне, дзе загучыць беларуская мова і адным з нямногіх у краіне. Да гэтае пары ў Оршы беларуская мова ў малітвах гучала толькі ў каталіцкіх парафіях.

Каментары да артыкула