Kaho b Vy žadali sterylizavać najpierš?
Deputat-łukašenkaviec Siarhiej Kaścian prapanavaŭ uvieści prymusovuju sterylizacyju dla asacyjalnych asobaŭ. Jak Vy staviciesia da hetaje idei, i ci jość čałaviek, jakoha b Vy žadali sterylizavać?
Taciana Narejka, maci, 34 hady:
— Ja chvareju na cukrovy dyjabet. Takim, jak ja, daktary nastojliva prapanujuć sterylizacyju. Ciažarnaść pahražaje žyćciu takich žančyn. U špitali, dzie ja lažała, žančyny malili daktaroŭ nie pieraviazvać im truby pad narkozam, bo chadzili čutki, što tak robiać. Ja zdoleła vyžyć i naradzić dzicia. Čałaviek, jaki prapanuje sterylizacyju, vidać, maje kulu ŭ hałavie. Ci impatent.
Śviatłana Niačaj, litaratarka, 32 hady:
— Takoha čałavieka niama. Ja admoŭna staŭlusia da samoj idei hvałtoŭnaj sterylizacyi. Chto heta budzie vyznačać, dzie nižejšyja słai hramadztva, a dzie vyšejšyja i jakuju zadaču toj ci inšy čałaviek vykonvaje svaim žyćciom?
Nadzieja Aŭsijevič, kiraŭnica pinskaj HA «Kalehijum»:
— Ja i padumać pra heta nie mahu. A pa jakich kryterach adbirać? A chto budzie prymać rašeńnie? Durata niejkaja.
Ihar Varaškievič, muzyka z «Kramy»:
— Čałaviek, jakoha ja b achvotna sterylizavaŭ, isnuje. Ale ja nie skažu, chto heta.
Pavał Urbanovič, 25 hadoŭ, etnasacyjapsycholah:
— Takoha čałavieka niama. Hetaja prapanova — zvyčajny fašyzm. Maltuzijanstva.
Ihar, pradaje alivu:
— Pieršym treba było b kastryravać tatu deputata.
Aleh Hułak, pravaabaronca:
— Na maju dumku, niama sensu ŭvohule aceńvać słovy deputata Kaściana z punktu hledžańnia abarony pravoŭ čałavieka. Takija idei siońnia mohuć pryjści tolki ŭ vielmi specyfičnuju hałavu. Apošni raz ja sustrakaŭ takija vykazvańni ŭ dziejačaŭ nacysckaje Niamieččyny. Cikava, jak adreahavała na heta presa, dziaržaŭnyja ŚMI? Jany pasprabavali chichiknuć nakont hetaha — i ŭsio. Vidavočna, što razbudavanyja dziaržaŭnyja ŚMI nia mohuć krytykavać aficyjnaj pazycyi aficyjnych deputataŭ, jakaja b jana ni była. A vykazvańnie takoje dzikaje, što heta jakraz padstava dla pamfletu, publicystyčnych ździekaŭ.
Vacłaŭ Areška, kulturolah:
— Samoha deputata. Takija prapanovy ŭžo hučali, heta adsyłaje nas da fašystoŭskich časoŭ.
Uładzisłaŭ Zavalniuk, ryma-katalicki śviatar:
— Heta vielmi prykraje słova. Pa-druhoje, treba vychoŭvać ludziej, inačaj usio heta budzie vajnoj ź vietrakami. Zamiest taho, kab pastavić ačyščalnyja zbudavańni ŭzdoŭž usioj raki, my stavim ich u samym nizie. A na praciahu ŭsioj raki praciahvajem plavać u jaje...
Alaksandar Šymbaloŭ, pravasłaŭny śviatar:
— Nikoha! Pa-pieršaje, usiaki čałaviek moža pakajacca, pieramianić siabie. U tym liku pjanicy i bamžy. Pa-druhoje, kožny čałaviek stvaraje svajo žyćcio z dapamohaj svajoj voli. Boh daŭ kožnamu svabodnuju volu. I kali my pačniom niekaha sterylizavać, to parušym volu, jakuju daŭ Boh.
Apytvali Śviatłana Kurs, Źmicier Dziadzienka