Chronika
U dačynieńni da kiraŭnički bieraściejskaj filii Sajuzu palakaŭ Biełarusi Aliny Jaraševič 22 krasavika raspačata kryminalnaja sprava. Jaje vinavaciać u machlarstvie: nibyta jana brała hrošy ad baćkoŭ, čyje dzieci nakiroŭvalisia na adpačynak u Polšču. Paviedamić pra heta pres-słužba UUS abłvykankamu vyrašyła tolki na pačatku červienia. Da pačatku červienia SPB tak i nia zdoleŭ znajści drukarni dla vydańnia hazety «Głos znad Niemna».
Ramualda Ŭłana, zasnavalnika «Novoj haziety Smorhoni», 11 traŭnia zatrymali j dastavili ŭ Smurhonski RAUS; u SIZA jon prabyŭ da 13 traŭnia. U studzieni jon byŭ asudžany na hod pazbaŭleńnia voli za DTZ — najezd na velasypedysta. Pavodle Zakonu ab amnistyi jaho termin pakarańnia skasavany. 10 traŭnia Ŭłan viarnuŭsia ŭ Smurhoni j byŭ zatrymany milicyjantami pa padazreńni, što ŭchilajecca ad adbyćcia pakarańnia. Tolki ŭmiašańnie advakata dazvoliła jamu vyjści na volu.
Z žurnalistami hazety «Narodnaja vola» Marynaj Koktyš i Vitalem Harbuzavym u redakcyi vydańnia 27 traŭnia pravioŭ hutarki staršy inspektar adździełu pa masavych mierapryjemstvach HUUS Mienharvykankamu Siarhiej Siaviec. Milicyjant cikaviŭsia artykułami pra ruch «Abaroncy Ajčyny».
Za dziejnaść ad imia niezarehistravanaha ruchu «Vola narodu» 27 traŭnia prakuratura Haradzienskaha rajonu papiaredziła Franca Aŭdzieja.
31 traŭnia ŭ Miensku zatrymany Alaksandar Skrabiec, brat eks-deputata Siarhieja Skrabca, adnak u toj samy dzień vypuścili pad padpisku ab niavyjeździe.
Žurnalistku hazety «Niediela» Kaciarynu Tkačenku 31 traŭnia vyklikali ŭ Savieckaje RUUS Miensku dla tłumačeńniaŭ z nahody artykułu «Našy palaki», nadrukavanaha ŭvosień. U artykule krytykavałasia dziejnaść byłoha staršyni SPB Tadevuša Kručkoŭskaha.
Da haładoŭščykaŭ u Žodzinie 31 traŭnia vyklikali chutkuju dapamohu: pahoršaŭ stan Sieržuka Marčyka i Jaŭhiena Vałkaŭca. U Sieržuka — astma, u jaho vyjaŭleny źmieny ŭ bronchach. U Jaŭhiena — tachikardyja. Na 10-ty dzień u suviazi z paharšeńniem zdaroŭja spyniŭ haładoŭku Pavał Karaniuchin. U Žodzinie 3 červienia adbyłosia adkrytaje pasiadžeńnie kamisii ŭ spravach niepaŭnaletnich, kudy vyklikali baćku haładoŭščyka Siarhieja Muraški. Siaržuk Marčyk 3 červienia spyniŭ haładoŭku. 5 červienia haładoŭku spynili ŭsie astatnija.
U Kalinkavičach z 1 červienia paśla niekalkich miesiacaŭ tranślacyi pa kabelnym telebačańni spynieny pieradačy ŭkrainskaha telekanału «Inter-plus».
Studentcy-zavočnicy fakultetu žurnalistyki BDU Alonie Andrejevaj kiraŭnictva fakulteta 1 červienia zajaviła pra pahrozu adličeńnia: Andrejeva była inicyjatarkaj kampanii za adnaŭleńnie adličanaj z fakultetu Volhi Kłaskoŭskaj, žurnalistki «Narodnaj voli». 2 červienia dekan nie pryniaŭ u Andrejevaj i Hanny Kavalovaj zaliku pa pradmiecie «Sacyjalna-palityčnaja prablematyka ŚMI», bo paličyŭ ich «maralna nie hatovymi» da zdačy.
1 červienia ŭ milicyju vyklikali staršyniu viciebskaj filii «Maładoha frontu» Janisa Čučmana, dzie na jaho skłali pratakoł za vyviešvańnie 5 traŭnia raściažki «Svabodu palitviaźniam!». Padstavaj dla składańnia pratakołu staŭ artykuł u niedziaržaŭnaj hazecie «Viciebski kurjer». Sud nad Janisam za arhanizacyju niesankcyjanavanaj akcyi pryznačany na 21 červienia.
Palitźniavoleny Valer Levanieŭski 1 červienia abviaściŭ haładoŭku ŭ znak pratestu suprać parušeńnia jahonych zakonnych pravoŭ.
U Voranavie 1 červienia adbyłasia sustreča načalnika adździełu hramadzkich arhanizacyj Kamitetu ŭ spravach relihij i nacyjanalnych mienšaściaŭ Jurja Ŭralskaha z kiraŭnictvam miascovaj filii Sajuzu palakaŭ i aktyvistaŭ polskich supołak: pradstaŭnik ułady namaŭlaŭ nie pryznavać vynikaŭ VI źjezdu arhanizacyi. Polskija aktyvisty ŭcisku ŭładaŭ nie paddalisia. Raniej taki ž schod ułady pravodzili ŭ Smurhoniach.
Haspadarčy sud Miensku 2 červienia pačaŭ razhlad spravy Biełaruskaha sajuzu moładzievych i dziciačych hramadzkich abjadnańniaŭ «Rada» suprać padatkovaj inspekcyi: padatkaviki naličyli arhanizacyi 125 młn rub. štrafu za hranty pavodle prahramaŭ TACIS i UNICEF i ŭžo apisali abstalavańnie. Sudovyja sprečki adkładzieny da času, pakul da spravy nia buduć dałučany nieabchodnyja dakumenty.
Białynicki rajvykankam 2 červienia źniaŭ z aficyjnaha ŭliku miascovyja struktury hramadzkich abjadnańniaŭ «Maładaja hramada» i Sajuz palakaŭ Biełarusi.
Prakuratura Partyzanskaha rajonu Miensku 2 červienia adklikała svaju zajavu ŭ Miniust pra źniaćcie z rehistracyi supołki Svabodnaha prafsajuzu Biełaruskaha na Mienskim zavodzie aŭtamatyčnych linij: vyśvietliłasia, što patrabavańnie, kab u supołcy było nia mienš za 10% rabotnikaŭ pradpryjemstva, nie hruntujecca na zakonie.
Aktyvistku niezarehistravanaj arhanizacyi «Zubr» Hannu Pietrakovič z Mahilova 2 červienia vyklikali na pasiadžeńnie administracyjnaj kamisii pa spravach niepaŭnaletnich: dziaŭčyna ŭdzielničała ŭ łancuhu nieabyjakavych ludziej, pryśviečanym 6-j hadavinie źniknieńnia Jurja Zacharanki. Z baćkoŭ spahnali 2 bazavyja vieličyni (51 tys. rub) štrafu za toje, što jany nibyta ŭchilajucca ad vychavańnia dački. Za ŭdzieł u toj samaj akcyi 3 červienia ŭ Leninskim rajonnym su-dzie aktyvist «Zubra» Vaładar Curpanaŭ byŭ asudžany na 30 bazavych vieličyń štrafu.
Kiraŭnik słonimskaha HA «Vola da raźvićcia» Michaś Varaniec 3 červienia źviarnuŭsia z zajavaj da staršyni sudu Pieršamajskaha rajonu Miensku, kab prymusić Biełteleradyjokampaniju vykonvać sudovaje rašeńnie. Varaniec vyjhraŭ sud suprać NDTRK za raspaŭsiudžvańnie chłuślivych źviestak u prahramie «Panarama», adnak dahetul u teleetery nie abvieščany prysud i nie kampensavany sudovyja vydatki arhanizacyi j jaje kiraŭniku.
Deputatu českaha parlamentu, upaŭnavažanamu českaha ŭradu ŭ pravach čałavieka Svatapłuku Karasku 3 červienia biełaruskaje pasolstva ŭ Čechii admoviła ŭ vizie biez anijakich tłumačeńniaŭ. MZS Čechii nakiravała dyplamatyčnuju notu biełaruskamu pasolstvu.
3 červienia sud Centralnaha rajonu Miensku apraŭdaŭ pravaabaroncu Valerja Ščukina, zatrymanaha padčas akcyi suprać pierajmienavańnia mienskich praspektaŭ.
Pasoł Niamieččyny Marcin Chiekier i pasoł Francyi Stefan Šmialeŭski 3 červienia naviedali palitźniavolenaha eks-ministra Michaiła Maryniča.
Haradzienskija ŭdzielniki travieńskaj akcyi «My pamiatajem» Jury Istomin, Artur Śmiatanin, Źmicier Aŭdziejčyk, Andrej Januškievič, Mikoła Voran i Raman Jurhiel 3 červienia atrymali papiaredžańnie: na praciahu 10 dzion jany pavinny zapłacić štrafy, inačaj u ich apišuć majomaść. Tolki Istomin padaŭ nahladnuju skarhu na sudovaje rašeńnie ŭ abłasny sud i čakaje novaha razhladu, pra što jon i paviedamiŭ sudovamu vykanaŭcu.
Deputat Homielskaha rajsavietu, hramadzki aktyvist Juraś Hłušakoŭ 3 červienia padaŭ u sud na kiraŭnictva abłasnoha krajaznaŭčaha muzeju, dzie jon pracuje: dyrektar muzeju Alaksandar Alejnik za karotki čas abjaviŭ supracoŭniku try vymovy i zaŭvahu za spaźnieńnie, u tym liku za 1-chvilinnaje. 6 červienia sud admoviŭ Hłušakovu ŭ jaho pazovie.
6 červienia pačaŭsia sudovy praces nad Andrejem Klimavym. Śviedkami abvinavačańnia vystupajuć 20 amapaŭcaŭ, jakija ŭdzielničali ŭ razhonie akcyi 25 sakavika.
7 červienia sud Centralnaha rajonu Miensku pierahledzieŭ kanfiskacyju majomaści palitviaźnia Michaiła Maryniča. Byłoj žoncy j synam viarnuli pras, televizar i velatrenažer.
BSDH paŭstała pierad realnaj pahrozaj likvidacyi: z 90 partyjnych strukturaŭ tolki dźvie zarehistravanyja ŭ niežyłym fondzie.
U turemnuju bolnicu patrapiŭ 7 červienia Valer Levanieŭski: z 1 červienia jon trymaje haładoŭku.
Aficyjny adkaz ad Kanstytucyjnaha sudu atrymała 7 červienia Partyja BNF: sud admoviŭsia razhladać prezydencki ŭkaz pra pierajmienavańnie mienskich praspektaŭ.
U Žodzinie 6 červienia ŭ milicyju pa telefonie vyklikali ŭdzielnika haładoŭki Paŭła Krasoŭskaha, chłopiec admoviŭsia. U toj samy čas da inšaha ŭdzielnika akcyi Alaksandra Vinahradava pryjšli supracoŭniki kryminalnaha vyšuku.
Staršynia Sajuzu palakaŭ Anžalika Borys 7 červienia nakiravała zajavu vajennamu prakuroru Viačasłavu Lubavickamu: jana vinavacić hazetu «Vo słavu Rodiny» ŭ raspalvańni nacyjanalnaj varožaści.
8 červienia partał belngo.info raspaŭsiudziŭ infarmacyju pra zahad ministra adukacyi Alaksandra Radźkova «Ab zachadach pa niedapuščeńni sprobaŭ uciahvańnia navučencaŭ i studentaŭ u supraćpraŭnuju dziejnaść palityčnaha tołku». Zahad, padrychtavany hałoŭnym inspektaram upraŭleńnia sacyjalnaj i vychavaŭčaj raboty Ministerstva adukacyi Viktaram Jakžykam, rekamenduje «arhanizavać ulik i indyvidualnuju rabotu z navučencami i studentami, schilnymi da ździajśnieńnia supraćpraŭnych učynkaŭ». Abaviazkovymi stanoviacca słužbovyja raśśledavańni pa faktach udziełu navučencaŭ i studentaŭ u niesankcyjanavanych mierapryjemstvach, jakija pravodziacca apazycyjnymi arhanizacyjami. Zachady «vychavaŭčaha ŭździejańnia» — «až da adličeńnia va ŭstanoŭlenym paradku ź liku navučencaŭ i studentaŭ».
∎
La mienskaha kaściołu Śviatoha Jazepa praciahvajucca nabaženstvy viernikaŭ-katalikoŭ. Jany patrabujuć viartańnia kaściołu j klaštaru bernardyncaŭ katalickaj hramadzie. U kaściole ciapier mieściacca archiŭ navukova-techničnaj dakumentacyi dy Biełaruski dziaržaŭny archiŭ-muzej litaratury j mastactva. Budynak kolišniaha klaštaru «akupavali» vajskovaja kamendatura j prakuratura.